斗花燈車（竹仔燔+斗燈+家族主神）
（台文POJ+漢羅雙文版）
Khì Ke-lâng chham-hóng Lāu-tōa-kong-biō kap Sam-sèⁿ-kong-biō keh 2 kang tō-sī kū-le̍k peh-goe̍h 13 Gêng-táu-teng（14 àm chiah-sī phó͘-phiàn khah-chē lâng chai-iáⁿ ê Pàng-chúi-teng）.
去 Ke-lâng 參訪老大公廟 kap 三姓公廟 keh 2 kang 就是舊曆八月 13 迎斗燈（14 暗 才是 phó͘-phiàn 較濟人 chai-iáⁿ ê 放水燈）.
Gêng-táu-teng ê oa̍h-tāng kah àm-sî Pàng-chúi-teng bô-kâng sī tī ji̍t-sî chìn-hêng, chāi-tē 15 sèⁿ ê ka-cho̍k ta̍k-nî chit-ê sî-kan lóng ē kā tāi-piáu ka-cho̍k pún-sèⁿ ê Táu-teng khǹg tī hoe-chhia téng-koân se̍h-kéng, piàⁿ-tīn-thâu tàu-nāu-jia̍t, kā Táu-teng gêng khì-kàu Khèng-an-kiong 「chhiong-tiān」chiap-siū Ke-lâng-má ê sîn-ui chiok-hok.
迎斗燈 ê oa̍h-tāng kah 暗時 放水燈 bô-kâng, sī tī 日時進行, chāi-tē 15 姓 ê ka-cho̍k 逐年 chit-ê 時間 lóng 會 kā 代表家族 本 sèⁿ ê 斗燈 khǹg tī hoe-chhia téng-koân 踅境, piàⁿ-tīn-thâu tàu-nāu-jia̍t, kā 斗燈 迎 khì-kàu 慶安宮 「chhiong-tiān 充電」chiap-siū 雞籠媽 ê sîn-ui 祝福.
Chit-pái in-ūi bô an-pâi sî-kan chham-ka 14 àm ê Pàng-chúi-teng phó͘-tō͘ gî-sek, só͘-tì kan-na lâi khòaⁿ Gêng-táu-teng se̍h-kéng, mā ka-chài Thiⁿ-kong-peh ū pó-pì bô lo̍h-hō͘, hō͘ gún ē-tàng khah khin-sang cháu-chhōe hó-hip-siòng kì-lo̍k ê tē-tiám tán-thāi Táu-teng chhia-tūi.
這擺 in-ūi 無安排時間 chham-ka 14 暗 ê 放水燈普渡 gî-sek, só͘-tì kan-na lâi khòaⁿ 迎斗燈 se̍h-kéng, mā ka-chài 天公伯仔 ū pó-pì bô 落雨, hō͘ gún ē-tàng khah 輕鬆 cháu-chhōe hó-hip-siòng kì-lo̍k ê 地點等待斗燈車隊.
雞籠出名 ê 得意堂木雕彩牌
Kin-kì góa sū-āu liáu-kái, àm-sî ê táu-teng chhia-tūi pí ji̍t-sî ê ke khah súi-khùi chiâⁿ-chē, góa siūⁿ pah-bīn sī in-ūi àm-sî hoe-hoe-niau-niau, ngó͘-chhái cha̍p-sek ê chhia-sin teng-kóng kā iû-hêng ê khì-hun chhui kah chīn-pōng, bōe-su ji̍p-khì-kàu nn̄g-ê sè-kài ê pian-kài, chìm tī hit-ê bōng-hoàn ê khong-kan tong-tiong. He chin-chiàⁿ m̄-sī ji̍t-sî ê iû-hêng thang sio pí-phēng--ê. Nā mê-nî ū ki-hōe, it-téng ài an-pâi lâi Ke-lâng tòa chi̍t mê, chia̍h-siau-iā phòe hîn-siōng Pàng-chúi-teng gî-sek（X .
根據 góa 事後了解, 暗時 ê táu-teng chhia-tūi 比日時 ê ke khah 媠氣誠濟, góa 想百面 sī in-ūi àm-sî 花花貓貓, 五彩十色 ê 車身 teng-kóng kā 遊行 ê khì-hun chhui kah 盡磅, bōe-su 入去到 nn̄g-ê 世界 ê 邊界, chìm tī hit-ê 夢幻 ê khong-kan 當中. He chin-chiàⁿ m̄-sī 日時 ê 遊行 thang sio pí-phēng--ê. Nā mê-nî ū 機會, 一定 ài an-pâi 來雞籠 tòa 一暝, 食宵夜 phòe hîn-siōng 放水燈儀式（X .
Ōe kóng tò-tńg-lâi, kî-si̍t kap Táu-teng siong-koan ê bûn-hòa le̍k-sú iáu-koh ū chin-chē chin iù ê tāi-chì sī góa bô liáu-kái--ê, 15 sèⁿ ka-cho̍k ê hoat-tián in-toaⁿ kap hō͘-siong kau-óng ê kò͘-sū mā sī ē kóng kah ba̍k-sái lâu-bōe-lī. Hian-siā, tīn-thâu tùi Ke-lâng bûn-hòa ê ì-gī kap kòng-hiàn he iū-koh-sī lēng-gōa chi̍t-ê kò͘-sū lō, mê-nî Tiong-goân-cheh lán chiah koh kè-sio̍k lâi kóng hō͘ siông-sè！
話 kóng 倒轉來, kî-si̍t kap 斗燈 siong-koan ê 文化歷史 iáu-koh ū 真濟真幼 ê tāi-chì sī góa bô liáu-kái--ê, 15 姓家族 ê hoat-tián 因端 kap 互相交往 ê 故事 mā sī ē kóng kah 目屎 lâu-bōe-lī. 軒社, 陣頭 tùi Ke-lâng 文化 ê ì-gī kap 貢獻 he 又閣是 lēng-gōa chi̍t-ê 故事 lō, mê-nî Tiong-goân-cheh lán chiah koh 繼續 lâi kóng hō͘ 詳細！
江姓斗燈花車
