「喂，咁你幾時寫我？」文青女友咁樣問我。
於是，就有咗呢篇文。
先此聲明，由於我唔算係MLA嘅歌迷，更加唔係文青(不論狹義定廣義上)，所以對於MLA嘅理解同睇法會同主流唔同，希望大家唔好當咗我係anti咁嚟狙擊。呀……或者用多數fans呢個講法好啲，畢竟MLA係唔係非主流呢樣嘢好似有排詏。
睇返維基先知，其實MLA出道年份比我想像中耐，係2004年。我第一次認識呢隊樂隊嗰陣，冇記錯應該係2012年定11年左右。雖然確實年份唔係好記得，但係情景就非常深刻。
因為係喺學校禮堂。
只要稍為對MLA有啲認識，你就知呢件事係有幾咁黐線。喺學校呢啲咁講求循規蹈矩嘅地方，竟然會喺禮堂用禮堂音響大聲播MLA呢類喺中學教職員眼中咁離經叛道嘅歌，可以話係完全想像唔到。而我相信個理由對各位讀者嚟講，可以話係意料之外得嚟又好似係意料之內——就係通識教育嘅活動。
點解我會話係通識教育嘅活動而唔係通識堂呢？事關當年我仲未係高中生，我讀嗰間學校嘅安排係初中同學未使讀通識科(not通識嘅科)住。成個活動只係班通識老師設計嚟畀低年級同學感受吓咩叫通識科，用個有趣(佢哋覺得)啲嘅方式嚟俾我哋了解下呢科究竟係做緊乜嘢。於是乎，我就喺茫然嘅情況下，聽班老師喺度講呢科有幾重要呀(直到今日，我都冇重視過呢科，覺得佢有價值，亦都只係中學教育外嘅因素)，成個課程架構呀，六個單元教緊乜呀之類嘅嘢。
喺講咗一大輪廢話之後，班老師為咗等我哋有個具體啲嘅概念，於是佢哋帶住我哋即場試吓同佢哋一齊做條DBQ，而為咗唔好咁枯燥，佢哋就揀咗MLA嘅其中一首歌作為資料。
「I want to sing you a song，about me and you went to Kowloon Tong。We have to be very strong，if we want to do someting very wrong～」
當喇叭徐徐播出主唱Nicole清脆得嚟又有啲頹廢嘅歌聲，我係為之一呆。事關成首歌嘅架構同混音，都同我平時聽開嘅流行曲好唔同，更重要嘅，當然係跟住落嚟新奇又前衛嘅歌詞，可以話完全衝擊緊我嘅認知。
我唔知究竟係我太無知，定其他同學太成熟，嗰陣我環顧四週，竟然冇同學出現啲學生哥典型「煨煨煨」嘅聲音。全場一片寂靜，我仿如置身喺星期日教會牧師講道嘅現場。
歌曲播畢，老師攞起支咪講解咗少少首歌大概係講啲咩，牽涉到「個人成長」呢個單元嘅一啲咩議題。當時我對呢隊樂隊產生咗濃厚嘅興趣，老師講嘅正經事，猶如endless rain into a paper cup，slip away across the universe。
放學返到屋企打開電腦，打完機悶悶地，又諗返起返學嗰陣聽過嘅浪漫九龍塘，就上youtube搵首歌嚟聽。然後順勢聽埋其他作品：濕濕的夢、菊花的味道，仲有幾首因為年代實在太久遠已經唔係好記得。於是乎，曾經有一段時間，我以為MLA係一個專唱咸歌嘅組合。尤其再過多一兩年，好鍾意今晚講嘢夜唔夜呢首歌，就更加固定咗我對MLA嘅印象。
當然，而家睇返，只係我咸濕，先特別留意呢幾首作品。
到底係點糾正返我嘅偏見呢？冇記錯好似係因為佢哋喺香港電影金像獎頒獎禮度唱美麗新香港，再一次吸引到我上網睇啲人點講MLA，先知原來係我一直誤會咗。之後幾年，斷斷續續有聽吓佢哋嘅作品，雖然人大咗，開始矇矓地覺得佢哋嘅歌有共鳴，但係始終唔算話好鍾意佢哋嘅作品。只係偶然地喺獨自一人嘅夜晚聽，好似感覺幾好。
又過咗幾年，喺大專校園認識到而家嘅女友(當時唔知佢係文青)。唔係好記得點發現咗佢好鍾意MLA之後，同佢提起我幾鍾意首浪漫九龍塘。不過見佢散發興高彩烈嘅氣場，為免越講越尷尬，馬上澄清返唔係聽咗好多。話題亦隨之結束。
過咗幾年，同佢一齊之後，先發覺原來佢係一個典型嘅文青，仲係MLA嘅「中級」fans——高級過普通fans，但又未去到齊碟同演唱會必到。雖然我都仲係冇乜點多咗聽，但MLA對於我嚟講又多咗一層意義。
今時今日，理想已經冇咗好耐，唔會再人有用IdealU嚟稱呼城大。昔日嘅文青，都要返工，唔會再充滿理想咁高談濶論點改變世界，左翼都開始變左膠。喺種種嘅歷史洪流之下，我唔會忘記有隊好有個人風格嘅樂隊，頹廢咁唱出同齡人係點成長。
P.S. 呢篇文真係有八成原因係為咗女友而寫，仲要打尖喺今日(8/12)出(我本身寫緊另一篇)。如果我真係因為呢篇文俾人鬧，希望佢可以安慰下我弱小嘅心靈(即係肉償畀我，哈哈哈哈哈哈哈哈哈哈哈哈哈哈哈)，謝謝。
