我的外公自內雙溪的老厝出來了後，佇九份仔買賣金仔，。伊的厝內是好額人，地主，開始做工課就毋免出門，沃雨、剾風的艱苦攏無拄著，人來厝內共金仔賣予伊，伊共金仔提去台北賣。有閒就去𨑨迌，全台灣行透透，嘛欲捌坐飛行機去廈門，日子過了傷誠快活。
落尾九份仔沒金仔了後，感覺宜蘭真好，搬去宜蘭，是阮老母小學的時，老母講，別的囡仔穿草鞋，抑是無穿鞋，in穿皮鞋。外媽講外公無法度出去食頭路，譬如講，有一擺是佇布店坐櫃台管錢的，輕可輕可，伊嘛無愛做。紮出來的金仔，予人剪筊（華語：詐賭）去，生活的錢無知咧佗位來的？我老母講，遐仔剪筊的誠厲害，外公自九份仔搬來宜蘭的庄跤，in嘛有消息，通知在地的，去共外公騙筊，有當時仔，是沫佇足庄跤的鐵厝仔內跋筊。等外公覺醒，𤆬警察去掠的時，金仔攏予人騙了了，我老母講，伊結婚的時，干焦提著一跤細細跤的金手指。
外公的兄弟，有人咧挖金仔，趁的錢投資台北的百貨公司。挖金仔的人定定會致到肺部的病，早死，伊的後生大漢了後，去百貨公司食頭路，做採購人員，是好缺。會曉拍算佮袂曉拍算，差真濟。
這馬遮仔老街開店的厝，以早是人蹛的，抑是開店，這馬攏變做店面，遊客誠濟。人實在是誠𠢕，山頂所在，路面懸低坎，巷仔內彎彎斡斡，厝直直起，佇內底生活抑是做生理，只因為以早挖著金仔，人就來矣！
我想著，外媽嘛是好額人的查某囝，原本是千金小姐，只是無讀冊，毋捌字，伊綴外公出來，２个人家己過日子，是按怎生，閣𤆬３個囡仔大漢，閣家己做厝內面的工課？若蹛老厝，厝內面有鬥做穡的人，外公兄弟仔是一人一个奶母𤆬的。蹛宜蘭了後，好額人變做散赤人，我的老母自高等科畢業了後，就靠伊趁錢，伊感覺壓力足大，「恁阿公逐擺揣頭路攏是揣我的。」是阮老母過身前幾若年才聽伊講的話，講這句進前閣手先對天拜一下，先講：「伊已經變做神矣！袂使講伊的歹話。」
外公的佇內雙溪的兜，阮老母細漢的時捌轉去，過年過節轉去，無車通坐，愛用行路的，老母的阿媽出來是坐轎，錢請人用擔的。遮仔古早的代誌無人咧講，干焦賰著阿舅佮伊的叔伯兄弟按怎分山分地，分遐的財產爾爾。
（2025.10.14.）
查教育部台語辭典
