台語文學

化火儀式完成，一切全成做烌，神鬼妖魔攏上天，深夜的民雄是一滴露水，清涼恬靜。

空lo-lo的大士爺廟，廟方人員開始收尾，攑掃帚向腰欲摒祭桌下跤，發現有囡仔倒佇遐，看伊的年歲和形體，感覺是挩窗，趕緊通報。機車共阿媽緊載轉來廟內，看著昏迷的挩窗，抱咧就大聲吼：

「挩窗！挩窗！你是走去佗位？阿媽揣你揣甲足艱苦啊！」

這時，挩窗沓沓仔知人，目睭寬寬仔擘開，看著的是阿媽毋是鬼王的面，精神就來矣，按阿媽的身軀頂躘起來，大聲喝：

「YA！YA！任務完成矣！我過關矣！」

「你這个戇囡仔！是咧練啥物痟話！」

「阿媽我佮你講，我去予一个叫哈囉的虎爺騙去神明界；阿媽我佮你講，神明揣我竟然是欲去消滅鬼王；阿媽我佮你講，那鬼王歹閣惡，會噴火喔⋯⋯」

「唉！這个孩子揣是揣倒轉來矣，但頭殼歹去矣，可惱啊！」