台語文學
「一、兩、三，正爿三隻，啊倒爿嘛是，攏總六隻，來共放出來！」挩窗跳起去鐵窗仔，蜘蛛彼款形共挽牢咧，手出力去搟，跤大力蹔落去。
無動靜。
「敢有遐僫？予我來！」哈囉用烏焦尾溜去鉤鐵窗仔的鐵條，頭向顛倒爿，硬去共搝，鐵窗仔猶原在在──伊深深欶一口氣，尾溜鉤予絚就衝落去──虎掌去爪塗跤，直直掰、拚死掰，火金星攏出來矣！莫講藃起來，連一屑仔振動都無。
關踮鐵窗仔內的龍鰲，尾搖搖咧，魚喙懊嘟嘟，真無奈。
挩窗毋甘願，發現廟內底有兵器，大聲喝講：「閃邊仔去，我來救恁啦！」挩窗這个囡仔疕，攑斧頭去刜、畫戟去鋸、大刀去撼，閣去借火槍來燒，無效就是無效。
「無路用啦！若有法度我早就共𪜶救出來啊！」騎虎王爺講。
「王爺啊！咱就緊來想辦法！較停仔民雄的大士爺就欲化火矣！佇彼進前，咱若無共鬼王收服，莫講人世，連神明界嘛會去予燒做火海，那是世界末日啊！」哈囉真著急。
「啊？啥物！遮爾仔嚴重啊！阮王爺和鬼王仝款厚性地，攏屬火，火無法度滅火，就愛龍鰲的水來沖啦！」騎虎王爺講。
「啊無代無誌共龍鰲關起來創啥？」挩窗問。
「就恁民雄人共舊廟過翻起新的，好的舊料毋甘擲，就掛佇咧壁堵，閣驚賊仔摒去，姑不將鬥鐵窗來共保護！」騎虎王爺講。
「聽講鄭順聰會來寫《大士爺厚火氣》，是某一工來騎虎王爺廟拜拜，看著龍鰲去予關踮鐵窗仔內，才起心動念來寫這部小說的。」挩窗講。
「無毋著，彼時看著真毋甘，我就下願講：『我欲用故事共救出來』。」鄭順聰作者行入來講話矣。
