《職場演義》系列好耐冇同大家見面。其實《職場心經》都少寫咗，因為香港人根本冇人有心機返工，我睇啲文嘅收視率就知道啦。個個都只係關心社會變成點，之後會點，大家可以點。或者都係好事嚟嘅，如果人人都只顧住返工同賺錢，何嘗唔係好可悲呢。
今集《職場演義》繼續有 Formula 1 車手，主人翁叫陸克萊 (Charles LeClerc) 。點解要寫佢呢？因為佢年僅 21 歲， 2019 年賽季加盟歷史悠久嘅強豪法拉利車隊，被視為車壇明日之星。陸克萊喺賽場上嘅表現一直進步，第二個賽站巴林已經排頭位出賽，如果唔係比賽末段引擎故障，只可以勉強守住第三位完成賽事，陸克萊可能已經獲得佢首個分站冠軍。直到第 13 站，喺比利時，陸克萊承受住由兒時開始鬥車鬥到大嘅摯友 Antoine Hubert 撞車身亡之痛，摘下首個一級方程式分站桂冠﹐成為法拉利車隊史上最年輕嘅分站冠軍。
喺隨後嘅意大利站，法拉利車隊主場，陸克萊喺 Monza 賽道，再次頂住勁敵平治車隊嘅兩位車手咸美頓及保達斯，由頭帶到尾，自己連贏兩站之餘，亦協助法拉利「光復 Monza 」。
陸克萊喺新加坡站連續三場排頭位出賽，正當佢諗住再次領放到完場之際，車隊安排隊友維度爾 (Sebastian Vettel) 提早入維修站換呔，用較新嘅車呔造出快圈，變相 undercut 咗陸克萊。呢位 21 歲嘅小伙子怒火中燒，喺無線電通訊系統入面同車隊隔空駁火，顯然對於自己失去三連冠嘅機會深深不忿。賽後雖然法拉利包辦冠亞軍，但陸克萊喺開完香檳之後都目無表情，急急腳返後台。
誠如旁述員丹尼爾 (陳恩能) 所言，陸克萊有佢嘅內心陰暗面。對於成敗得失，佢比起其他運動員睇得更重。當平治嘅保達斯聽教聽話，對於車隊嘅 team order 言聽計從，陸克萊就係另一個極端。
粗略統計，陸克萊 2019 年至少三次違反車隊指示，包括喺巴林站拒絕留守喺維度爾後面，一意孤行爬頭領放。喺意大利站嘅排位賽，陸克萊亦有「揼波鐘」嘅嫌疑，拉布式慢溜令喺佢身後嘅維度爾以及一眾車手錯失最後一次計時圈嘅機會，間接造就自己排頭位出賽。
丹尼爾話，陸克萊命途多桀，成長過程中先後多次失去摯親，除咗死黨 Antoine Hubert ，佢嘅契爺 Jules Bianchi 喺 2014 年嘅日本鈴木 F1 賽站撞車身亡，而親生老豆亦喺 2017 年，陸克萊逐鹿二程方程式時病逝。對於一個今年先至 21 歲嘅後生仔嚟講，佢嘅人生已經失去得夠多。對於個人成敗、榮辱有異於常人嘅執著，亦無可厚非。
之不過，車手生涯流流長，十幾年光陰，如何同車隊、領隊、隊友合作，以車隊榮譽為先，顧及車手之間嘅團結，不至於因為自己要賺到盡、贏到底而傷和氣，絕對係待人處世嘅一種藝術。雖然仕途係自己嘅、人生係自己嘅，但係一步一生，總需有其他人扶持、協助。得饒人處且饒人，未係你嘅，忍一忍手，唔好貪，畢竟得人恩果千年記，時來運到，屬於你嘅榮光，始終會歸於你。
