#香瓜仔鬚 (Hiunn-kue-á-tshiu) = 龍鬚菜
今仔日煮飯，我leh炒菜个時陣，問阮大家(Ta-ke, 婆婆) 龍鬚菜台語欲按怎講？
Ta-ke講：「香瓜仔鬚。」閣學著一个新的字，感覺歡喜。
想起，細漢的時，逐擺食飯，桌頂攏有喝(Huah)袂出名的菜、佮魚仔。我會問阿媽：「這菜/魚仔叫做啥？」
阿媽攏會講一个，我根本唸袂出來的名。
尤其是魚仔的名，聽起來～攏感覺較像是「人的外號」，比論「落跤ê」、「豬哥ê」、「紅面仔」這種「發音」的名，一點仔攏無像是魚仔的名。所以，我攏毋捌記起來過。
後來，入學讀國小以後，我開始學華語，台語講甲愈來愈袂輾轉(liàn－tńg，流利的意思)，我若是聽無阿媽講的台語魚仔名的時陣，會閣再問：「按呢，伊的國語的名欲按怎講？」
阿媽會講，「落跤仔就落跤仔，to閣愛國語！」
這馬(Tsit-má, 現在) 回想起來，阿媽這个回答，實在真正有時代ê氣魄。
所以，自細漢，我認捌桌頂ê菜，毋是靠名，是靠食起來ê味爾爾。
毋過，今仔日聽阮大家講著「香瓜仔鬚」，煞開始想欲重新認捌各種食物 (Tsia̍h-mi̍h) ê 台灣話按怎講。
學習ê動力，有當時仔嘛真正來甲較晏(Uànn)。
嘛淡薄仔思念起阿媽矣。
