飛機雲

每日都行路去天神站搭車返屋企，尋日日本得4度，我收工既時候仰望天空，睇到我好鍾意既飛機雲，好耐冇從地面望向天空，我企左係條街度望左一陣，然後眼淚突然又控制唔到咁湧出黎。

得返我一個去仰望天空，得返我一個行路去搭車，得返我一個去超市買野，所有野都係得返我一個。

讀書時候比人打，要我扮狗吠，要我扮狗比人騎我都捱得過，點解今次我覺得咁難捱？
我淨係等呢幾個月我已經覺得咁辛苦，如果妳真係唔要我，我要點樣捱落去？
我個腦出現左好多個點解，我望住個天一路諗點解，過左一陣飛機雲就散去，根本得唔到答案。

今日我左返教會，而家每星期我都好勤力返教會，其實有時覺得聖經故事係幾好聽，同時我仲可以食佢既LUNCH。

每個星期返完教會我都會返公司做半日野，直到天黑之後再去食飯，基本上都係固定操作，反正得我一個人做既所有野都係咁孤單，無所謂啦。

今天，我祈禱仍然希望主可以保守妳既工作，妳既身體同埋我地既家人平安。
我愛妳。