話說尋日落大雨, 我收工既時候諗住去Aeon度買特價飯返屋企, 我從後門行入去, 有條斜路同樓梯, 我心諗...落雨行斜路好易跣親, 都係行樓梯穩陣, 點知說時遲那時快, 我就係樓梯跣親, 隻左手中指瞬間爆剛流血, 右手手指公篤落樓梯度篤魚蛋, 痛到我死, 最柒既係隔離有個阿伯係斜路度望住我好想過黎幫我, 我話佢知我冇事, 然後我搵個地方哩埋拿拿聲拎張紙巾出黎包住隻手指先, 流血都流左好耐先止到血, 搞左一輪先去到買飯返屋企食...
成件事發生得實在太柒...但又好痛, 尋晚又訓得唔好, 因為全身起敏感, 半夜痕到醒左, 好辛苦...而家日日訓到4點幾都會醒, 可唔可以大覺訓天光呀???
今日返教會, 上海叔叔讚我, 話我黎左呢個教會之後只要我係日本既日子我都有返教會.
因為你之前同我講過每個人都需要有一個信仰, 即使對我黎講呢個信仰未必真實, 但心入面總要有一個信仰, 可以同呢個信仰禱告, 傾訴, 呢個信仰會陪住我, 當我發生咩事, 信仰都可以令我撐過去.
我回想返最初, 有一日我想跳樓, 當我企係窗台既時候, 門鐘突然響起, 我猶豫左一陣去唔去開門好, 當時我心諗, 反正都要死, 唔爭果幾分鐘, 我就去左開門...當時有兩個人同我講而家佢地黎做宣傳, 搞活動, 我就聽下佢地講咩, 點知有一個女仔同我講中文...
佢問我 : 你唔係本地人, 當你唔開心既時候你會做d咩野?
我答佢 : 我會打電話比朋友傾下計, 講下自己唔開心. (其實我只係想打發佢走)
點知佢就突然同我講起聖經, 我就話我都有聖經app, 佢叫我打開聖經其中一段, 叫我讀出黎...
但願使人有盼望的神, 因信將諸般的喜樂, 平安充滿你們的心, 使你們藉著聖靈的能力大有盼望! (羅馬書15章13節)
讀完之後, 果刻我覺得個天好似唔想我咁早死住, 派兩個使者黎拯救我, 雖然我feel到佢地係邪教, 但係果下我的確覺得被救, 同佢地傾完之後, 我就默默坐返低做野了...
然後幾次都係咁, 每當我想放棄自己既時候就會有d事情發生, 彷彿唔比我有輕生既念頭一樣...
主啊, 其實我係感謝祢的, 我想講, 祢令我既生命力堅強左, 因為每次我想放棄自己既時候祢都會安排一d事比我遇見, 每次都會平伏我既情緒...所以其實我到而家都係期待每個星期日返教會既日子的.
返完教會又係返工既時間, 不過因為兩隻手指好痛, 今日唔會做好耐, 我要早d返屋企療傷, 我好掛住妳啊, 如果妳係度, 今日我地一定會係去完教會之後就係去探險既時間...我希望仲有機會可以做到呢件事啦...
今日仍然愛妳, 想念妳.
