收著冊無斟酌看內容隨掠做伊是華語冊 hōo 我哭呻幾句以敨放 hőng 騙 ê 感覺，起因讀著 ê 紹介攏講伊是台語 ê 封神榜。
冊開始反以華語讀閣不止仔順，不過那讀 mā 那開始㧎㧎隨換台語讀，怪奇呔 ē 遮爾仔順，m̄-koh 我 m̄ 是文言一致按呢讀，我是自動 kā 字轉做我學 ê 台語字我講 ê 音，像「他」我 kā 轉做「𪜶」，「不是」我 kā 轉做「m̄ 是」按呢。雖罔按呢 ê 轉化 hōo 我讀甲順順順，總是我 mā buē 使得按呢 m̄ 捌字看告示一霎仔尊存攏無隨踅轉去讀𤆬讀...
我真𠢕剾洗別人「欠錢怨債主，不孝怨父母」，我家己 mā 是半斤八兩「bué 冊 m̄ 認真讀，讀無隨詈別人。」
人冊 ê 目錄寫甲清清楚楚「臺語原版《小封神》」又閣特別 tī 這段紹介以醒目 ê 紅底做提醒。遮爾仔清楚 ê 提醒，我猶原有法度成做大目新娘揣無灶 mā 是厲害非常 ê 見笑代。
捎著摠隨綴摠頭行，那讀那踅去呂美親教授 tī 「亞特聊聊天」ê 一段話，大意是按呢。
這本《台語現代小說選》我 ê 學生 kā 我反應，𪜶開始讀有台語文學抑是讀甲較 buē 遐爾仔艱苦。
這段話 tī 彼當時並無發水泱(tsuí-iann)，起因我手頭 ê 台語冊，自讀第一本李恆德老師 ê《彼年的熱天》到近來上新 ê《錦荔枝的滋味》攏 hōo m̄ 捌學過台語文 ê 我一讀就熟手。
M̄ 知，這敢是 ē 曉講、聽台語佮舊底就捌學過這个符號 ê 因端，tshan-tshiūnn 搪著使用拉丁符號做書寫標準佮使用漢字做家己文字一部份 ê 日文攏 ē 曉讀 mā ē 曉寫，只是讀音佮我認為 ê 意思絕對無相仝，總是我有心想 bueh 學遮 ê 語言遮 ê 符號，我猶 m̄ 是猴齊天有才調 72 身，不而過遮 ê 學習齊是我上讚 ê 肥底佮家私頭仔。
囉哩囉嗦拖沙一堆，重點 kan-na 這 -- 我無特別學台語字 kan-na 想 bueh 讀我上熟似卻是上生份 ê 文學按呢 niā-niā，就按呢台語文學佮客語文學(客語文學，雖罔 kan-na 讀過一本) 攏成做我上捷讀 ê 文學 mā 上捷 bué ê 冊。
所致寢頭仔掠做這本冊是掛「台語」賣「華語」確實 hōo 我氣持ち buē 喨，起手 bueh 寫光批 hōo 冊店要求𪜶 kā 我換貨。
總是凡勢是食甲這个較 buē hōo ホルモン(horumon) 牽 leh 行 ê 歲數，所致 Das ist mir egal➀ ê 情緒總是 tsuē 過熱情，準做我一日貼貼攏 m̄ 知機家己到底 teh 無閒 tshi-tshā 啥物，冊繼續擲 tī 膨椅，無要意 ê 燒水捙拚過做茶鈷呻冊就按呢擲 tī 膨椅隨在伊生活到雄雄想著家己傷過杜猴損五穀，這本按台灣坐 DHL 來德國 ê 台灣封神榜比食一頓正港德國豬跤閣較鞏金，感覺 hőng 偏 mā buē 使得遮爾仔討債。
自來 ê 情緒叨撚處理好勢，重新餾一遍，我 mā 𠢕賊仔較惡人 ê 牽牽一大拖，交翁練仙破豆有才調半路智覺我敢若 kā 若 bueh 雙生仔 ê 講做英語去，搪著出世第一語言呔無這个智覺？
我絕對無喙脣一粒珠交 buē 曉駛船嫌溪狹 ê 硬 bueh tuì 這本冊按白白仔布染到烏，絕對無，是這本冊太像手頭另外一本冊，只不過作者有清清楚楚表明，百分之八十是寫華文，「台語」是做重點提醒 ê 靈魂主角。
這本八成華語，兩成台語 ê 書寫方式是現代華語交現代台語標準化 ê 結果，李恆德老師 ê 作品 mā 是，許丙丁 ê 年代交彼五本我正港無彼个才調 kā 伊轉台語閱讀 ê《賴和選》齊相𫝛，白話字因為教會有一套正式 ê 標準，漢以猶原借字。
「這本《台語現代小說選》我 ê 學生 kā 我反應，𪜶開始讀有台語文學抑是讀甲較 buē 遐爾仔艱苦。」，啊！我哪無想著這《台語現代小說選》P:15 ê 註解。翻頭斟酌讀 P:15 ê 第 14 註解，《走揣小封神的傳奇》無閣 tshan-tshiūnn 瑞士德語按呢，敢若聽無，窮實是全部聽無 ê 放棄。
「台語有分文白音，你呔 ē 遮爾仔分 buē 清」我若聽著賴和先 tuì 我提出抗議。
「賴和先請你莫見怪，你 ê 作品自 2021 按台灣坐 DHL 來德國，m̄ 管我按怎讀就是讀 buē 出智慧，請你莫見怪。」
閱讀 ê 慣勢讀過 ê 文字，除非有重要性 buē 閣翻頭讀一遍，uī-tio̍h 澈底理解是我大細心 kā 四角字齊當做中國字來讀抑是家己無去細膩著局長序 ê「臺語文學的復振，以及臺南故鄉的深情，就是這兩代臺語作家亢時空對話的特殊創作當中，一脈相承的數念(Siàu-liām) 。
當我理解現此時有教育部標準化 ê 利便 hōo 我免閣驚惶「我們」敢是「咱、阮」，「他們」敢是「𪜶」這類 ê 雙跤雙船，心頭亂慒慒 m̄ 知愛讀華文抑是讀台語文，特別是兩文讀起來攏順順順，像賴和先 ê 作品。我知彼是我 buē 曉文白音 ê 關係，m̄ 是賴和先 ê 問題。
Uī-tio̍h 證明我 ê 推斷是正確，台華交纏 ê 語法隨關機，重新設定台語開機，第一段文字免讀甲「儼然(giâm-jiân)」出現，我已經有底氣 kā 我認定 ê 無確定轉做確定，像「亦時常出沒，儼然(giâm-jiân)是可怕的魔窟了。」，我 kā 讀做「也時常出沒，儼然是可怕的魔窟矣。」這个讀法凡勢無正確，總是伊屬於我 ê 政治正確。
《走揣小封神傳奇》是一本正港蓋好看 ê 冊 mā 引𤆬我這个頇顢讀冊 ê 人有法得徛 tī 教育外感受『成做咱本土語文的「台語物語」曲頭』交我家己 ê Somewhere in time。
這 m̄ 是讀冊心得 mā m̄ 是冊評，以上。
➀ 一屑仔攏無要意
2022.09.10
