Uì 開始食三塊十箍 ê sio̍k-pháng 年代開始，露螺 pháng、波蘿麵包是三塊十箍內底逐擺一定 lóng-ē 出現 ê 基本盤。行 ji̍p--khì tsit 間 tī 現代看起來真 buē 時行，tī 舊時應是鑠奅 ê 店，一位少年頭家用無啥物氣力 ê 氣口 kap gún 拍招呼。
平常時我家己買麭三分鐘就 ē-tang 解決，因為我 ài 食臺灣 tsit 款油光油光 ê 麭，所以入店進前，我家己 ē 先 tī 外口相好 kám 有我 bueh 買 ê Pháng。若是佮 gún 翁做伙，我 tō ài 開淡薄仔時間 kā 伊紹介店內底 ê pháng。Tī gún 翁某 tī 討論 pháng ê 過程，少年家問我「請問你們在說法語嗎？」
我幌頭 kóng m̄ 是「是德文」。
我 ê 回答可能有去揤著少年家佗一个開關，伊開始紹介 hia 連 gún 翁家己 lóng 無啥興趣 ê pháng。Gún 恬恬仔聽伊-ê 分享，也分享 gún 家己 tī 德國食 pháng ê 習慣。過無 luā-kú，一位序大人 uì 外口行入--來。伊一看著 gún kóng「來坐-lah，bueh 食龍眼無，gún 家己種--ê」。
Tī 我 bueh 開喙時，少年家 kóng「人𪜶聽無台語-lah」。
我微微仔笑無接喙少年家 ê 話。「多謝，真 tsuē 冬無機會食著 gîng 眼--ah，tī 外頭數念伊，tńg--lâi bueh 揣伊 iū-koh 定定 m̄ 著時，tsit 回著時 tńg--lâi suah buē-kì--tit ài 食伊」。
我 uì 序大人 hit 雙厚 koh 結趼 ê 手接過gîng 眼，紲手挈一粒問 gún 翁「Probieren，gîng 眼？」(bueh 試食龍眼無?)
Gún 翁問「臺灣荔枝？Litschi？」
「Tsia 無荔枝，bô-thang 請恁，真歹勢。」序大人 kóng。
聽了，我緊說多謝。Tī gún 翁 tī 試食 gîng 眼時，序大人 kóng 一句，tsit 幾年 tńg--lâi 臺灣所發現 ê 代誌。
「小姐，你 ê 台語 kóng 了真輾轉，佗位學--e？」
「Tī 媽媽 ê 腹肚 tō tī 學--ah」我微微仔笑答，心肝蒂有 tsiok tsuē m̄-kam，因為我想--著 hit 年參朋友參加伊 ê 朋友 ê 烘肉會。Hit-sî，有兩位96歲 hām 102 歲 ê 阿媽坐 tī 邊仔 na 開講，na 看 gún tsia--ê 囡仔 tī 烘肉。可能是數念家己 ê 序大人，我行過 tsham tsit 兩位阿媽 phò-tāu。兩位阿媽雄雄 tuì 我 kóng「小姐，你 m̄ 是 kóng 英文，台語 ná-ē tsiah 輾轉，比 gún tsia--ê 孫 koh-khah 𠢕。」聽--著 tsit 句話，真 m̄-kam 阿媽。因為，我想--著家己 ê 親情，有人 tsham 孫 kóng 台語 hōo 家己 ê 新婦 kóng ē hōo 囡仔 ê 英文腔口歹聽... mā 想--著幾年前，gún 翁 ê 同事𤆬拄結婚 ê 臺灣太太來 gún 兜行跤花。
Tsit 位臺灣太太英文無幾句，德文無半句。伊聽我 tsham 𪜶某冇談 ê 聲調，ná-tshan-tshiūnn 𪜶某 ê 阿媽 tī 講話 ê 聲調。伊問我「你是 m̄ 是 kóng 台語？」
「是--ah，台語--ah」我答。
Gún 翁 ê 同事目頭 liap 一下，iōng 歹勢 ê 口氣 kóng「gún 某 kóng he 是無水準，無讀冊 koh m̄-bat 字 ê 人tsiah-ē kóng ê 話。」
我無回答伊所 kóng ê 問題，我問伊「你 kám-ē 感覺你所 kóng ê 德文是無文化 ê 人 tī kóng ê 話？」
「你知影 gún-ê 皇帝 tiàm 德國歷史非常重要，著 m̄ 著」伊問。
「你知影 m̄ 是 tiàm Google 翻譯揣 ē 著 ê 語言 tsiah 是語言，著 m̄ 著」我答。
Gún 翁同事笑笑無回答，我 mā 無 koh 繼續 tsit 个話題。
恬恬聽眼前 ê tsit 位德國新婦 ê 委屈代。Tsham 𪜶翁 khì 別人兜，逐家 uī-tio̍h 伊 buē-hiáu kóng 德語，換談英語。落尾 hōo 人發見，伊連英文 lóng 聽無半句。伊感覺 hőng 看 buē 起 ê 代等等。聽伊談 tsia--ê 代，我 tī 想 m̄ 知影伊按怎看待𪜶翁所 kóng ê 德語。因為𪜶翁 hām 𪜶規家伙所 kóng ê 德文，德國學校應該無 tī 教，Google 翻譯 mā 揣無。無文字著是無水準無文化 tsit 件代 hōo 我想--著，uì Ka-ná(Ghana)來 ê Anthony hām uì Eh-lī-tshuì-a(Eritrea) 來 ê 阿萬所分享 ê 話。
「利便 ê 網路，人 hām 人 m̄ 免講話，只要有 Google。Google 翻譯揣無 ê 話，tō 是無文化，無水準。Tsit-sî，lán tsit 幾个人，每一个人 lóng 有家己 ê 語言。有 ê ē-thong，有 ê buē-thong ，m̄-kò lán 猶原 ē-tàng phò-tāu。Tse 是為啥物？Tse 是 lán-ê 肥底成就 ê 美麗 hām 趣味。」
2022.03.10 刊登台灣教會公報，期別：3654
窮真我 tuì 這本散文集無特別感想。起因若愛亞 ê 作品 tī 這本冊出版 ê 時間已經成做海王星佮太陽 ê 距離。Tuì 這本冊無啥特別 ê 感受是按怎又閣專門寫一篇？這其中決定有啥物文字擗著我記持，所致想 bueh kā 伊記錄落來。畢竟，文字 tuì 我來講是記持 ê 翻草 mā 是點拄家己 ê 照妖鏡。
〈我願意做伊的倒手〉hōo 我想著行尞波蘭 Cieszyn ê 往過隨 kā 文章捎出來熥，看家己敢閣有 Daisy Hochberg von Pleß ê 角度抑是開喙合喙攏愛成做「詩」或是食菜，食菜，食到肚臍為界 ê 喙講佮手做 ê 無相仝。到目前為止，我會使得十萬分 ê 確定，我無沐著任何一項，這凡勢佮我清楚知影掛目鏡猶原 buaih 成做紳士有相干。
我 tuì 這本冊無啥物特殊 ê 感想，若是愛揣一个感想 kan-ta tī 頭序彼段捌寫 tī 別篇 ê 「直譯佮意譯」，總是我感謝伊引𤆬我認捌另外一本，目前猶原 teh 等待 ê《當風dī秋天的草埔吹起》。
最後，猶原愛寫，這 m̄ 是讀冊心得抑是冊評。這只是一篇迵過無仝作者行踏佮家己 m̄ 捌愖過或是已經 buē 記 ê 事項，甚至敨開綴人綁繚索 ê 眼界。我 m̄ 知影臺語文學按底時開始，總是迵過這本 2010 出版 ê 散文集，我 ē 講臺語文作品凡勢猶無閣大量，總是按這本 2010 出版 ê 散文行跤到王秀蓉老師 ê《我咧唱歌》、《咱來讀讀》，王昭華《我隨意，你儘量》，「世界文學台讀少年雙語系列」《你無聽--過 ê 格林童話》、《青瓦厝 ê 安妮》、《銀河鐵道 ê 暗暝》、《拉封丹寓言集》台譯名著系列 101《悲慘世界》窮實已經看 ē 出臺語文 ê 變化，準做捷捷有人 teh 講臺語文猶原是「縛跤帛」ê 作品，我猶原認為臺語文文學有法度 tī 短短無夠20冬 kā 慣勢承華文 ê 眼界轉做家己 ê 眼界，這是一件真僫得 ê 無簡單。這是教育釘根 ê 效果，準做這久 ê 人猶原獅獅獅上身；
心適 ê 人出門𤆬三隻獅，看東看西、食東食西、bué 東 bué 西
無味 ê 人出門 mā 𤆬三隻獅，嫌東嫌西、怨東怨西、罵東罵西
伊猶原 teh 向前行，tshan-tshiūnn 往過使用法文成做官方書用字 ê 英國，現此時 mā 生湠出家己 ê 獨特。
Google 紹介我讀「書」成做次文化 ê 報導，我 tsiah 知影家己 m̄-nā 是網路厝角頭 mā 是現實社會 ê Außenseiter, Outsider。人類開千外冬反抗智識獨佔，教育普遍猶未行到一百冬，本底 ê 鞏金閣包銀翻身做歹銅舊錫，人類 ê 進步 kan-ta 正港是食無三把蕹菜，就欲上西天 ê 靠勢。是講，別人 ê 次文化是我 ê 主文化，我愛我 ê 主文化。
這 m̄ 是讀冊心得 mā m̄ 是冊評，伊 kan-ta 是一篇讀劉盈成助理教育譯序「欲翻譯外國ê文學經典，有人嫌台語無彼號資格。我想著囡仔時代，老母捌提海明威《戰地春夢》ê華譯本，改用台語講予我聽。彼當陣阮英文袂曉，毋過，無仝語言有通互相來理解，這阮自來毋捌懷疑」擉著我心 ê kā 兩篇舊漚舊臭重新妝挺做一篇新文記錄。
投稿文章錄 tī 2021.01.23，斯當時 ê 漢羅寫法參考台文通信Bong報交家己意愛 ê 寫法。這久翻頭看彼久，語法交理路齊無順序，總是跤步無踏出去是 bueh 按怎揣著路。
2021.01.23
