# 老餅心態：香港科技發展最大嘅敵人
香港成日話要做創科中心，但講咗咁多年，交唔到貨。政府投錢、起科學園、搞數碼港，硬件落咗唔少，點解就係搞唔起？好多人賴政策、賴市場細、賴人才流失。呢啲當然有份，但有一樣嘢大家唔太敢講：老餅保守心理。
## 「做開咁做」嘅詛咒
香港IT行業有一班人，佢哋可能喺九十年代、千禧年代入行，當時嗰套技術已經刻咗入骨。你同佢講Rust，佢話C夠用；你同佢講雲原生架構，佢話自己管server最穩陣；你同佢講DevOps，佢話「我哋以前都冇呢啲」。
呢種人最鍾意講嘅一句話係：「如果唔係真係有問題，點解要改？」
問題係，當你等到「真係有問題」先改，通常已經太遲。科技呢個行業，你唔進步就係退步，冇原地踏步呢回事。人哋已經用緊Kubernetes做container orchestration，你仲喺度手動deploy；人哋用緊機器學習做自動化，你仲喺度寫hardcode rules。等到客戶走晒先醒覺，遲。
## 護食重過進步
點解班老餅咁抗拒新嘢？好簡單：因為新嘢威脅緊佢哋嘅地位。
佢哋嘅價值建基於「我識呢樣嘢」，而唔係「我識學新嘢」。當新技術出現，佢哋突然變成新手，呢個感覺佢哋受唔到。所以佢哋嘅本能反應唔係去學，而係去質疑：「呢啲嘢唔實用」、「學咗都冇用」、「等多幾年睇吓先」。
香港啲討論區成日見到呢種論調。你講Rust嘅memory safety優勢，實有人彈你「可以unsafe繞過」、「學習曲線太高」、「業界唔widespread」。句句好似有道理，實際上全部都係藉口。你去睇外國論壇，人哋討論嘅係點樣應用、點樣optimise，唔係應唔應該學。
呢種護食心態，令到成個行業嘅知識更新速度慢過人。
## 打壓新人嘅惡性循環
最毒嘅係，呢班人唔止自己唔進步，仲會阻住後生嘅進步。
你係新人，想喺公司推新技術，佢哋會用各種方法shut you down：「你後生唔識」、「試過唔得㗎喇」、「老闆唔會批」。就算你嘅提案有理有據，佢哋都可以用「經驗」嚟壓你。因為最終話事權喺佢哋手上，你講乜都冇用。
久而久之，有能力有熱誠嘅人走晒。留低嘅要麼係已經放棄咗嘅人，要麼係同流合污學識點樣「順住嚟」嘅人。成個組織嘅創新能力就係咁被蠶食。
然後呢班老餅會話：「睇，班後生仔都係唔得㗎。」自證預言，完美循環。
## 同外國嘅對比
你睇外國嘅tech公司，文化完全唔同。佢哋鼓勵bottom-up嘅創新，new grad都可以challenge現有做法，只要你講得通。佢哋唔會因為你後生就dismiss你嘅意見，反而會好奇你帶嚟咩新perspective。
北歐國家點解可以細細個都出到咁多創新？因為佢哋嘅文化係「試咗先講」，唔係「穩陣至上」。失敗咗？學到嘢就得。香港呢？失敗咗你就俾人標籤，成世都係「嗰個搞掂嘢嘅人」。
呢種對失敗嘅恐懼，再加上老餅嘅打壓，令到香港人寧願守住本地嗰一忽，都唔願意望出去。
## 結構性嘅困局
老實講，呢班老餅都係受害者。佢哋成長嘅環境教佢哋「揸住一技之長就可以食一世」，而家世界變咗，佢哋適應唔到，自然會驚、會抗拒。
但同情歸同情，事實係佢哋嘅存在阻礙緊成個行業嘅發展。香港科技界需要嘅唔係更多錢、更多政策，係一場世代交替。等呢班人退場，讓新嘅思維入場。
問題係：等唔等得切？
當內地、新加坡、台灣都喺度跑緊，香港仲喺度同班老餅角力，呢個時間成本，輸唔起。
## 寫俾後生嘅人
如果你係嗰個日日俾老餅block住嘅人，我只可以話：唔好同佢哋嘥時間。你說服唔到一個唔想被說服嘅人。
搵到對嘅環境，同識得欣賞新嘢嘅人合作。或者自己搞，雖然難，但起碼唔使日日做戲。
仲有最重要嘅一點：將來當你有權嘅時候，記住而家嘅感覺，唔好變成你最憎嗰種人。
科技進步靠嘅唔係老餅俾唔俾你做，係你肯唔肯自己行出嚟。
