今年藝術節重頭表演由捷克布爾諾國家歌劇院帶來柴可夫斯基改編嘅歌劇《Eugene Onegin》。
故事講男主角跟咗個friend去佢女朋友屋企玩，而女朋友有個妹，阿妹見到男主角就春心蕩漾，夜晚輾轉反側寫咗好多情詩情信，諗住第二日俾男主角，點知男主角收到之後唔領情仲要揶揄佢，又話自己浪子又話自己冇腳雀仔，妳唔好跟住我啦咁。
跟住過咗冇幾耐到阿妹嘅命名日，類似成年禮嘅大日子，個friend又拉埋男主角去個宴會，機緣巧合下男主角同阿妹跳咗一隻舞，點知周圍啲三姑六婆話佢攀龍附鳳，又話佢賭棍又話佢乜乜乜乜，男主角唔高興一怒之下就走去搞佢個friend嘅女朋友即係家姐，勾二嫂呢家嘢搞到個friend好唔高興決定要同佢決鬥，最後男主角殺死咗自己個friend，懊悔到一走了之去流浪。
就咁過咗廿幾年，返到嚟發現阿妹嫁咗人仲要嫁得好，做埋親王夫人。男主角先發現自己好鬼鍾意佢，然後就走去同阿妹表白，阿妹雖然念舊情，但係佢決定我唔可以跟住你個仆街，我要撇甩你，故事就咁完咗。
撇開歌劇演員們嘅歌技了得外，二百年前呢個故仔同而家發生喺你我身邊嘅事都不遑多讓，仲要一讚佢哋嘅舞台設計非常之有心思，令到成個表演生色不少，就算聽唔明佢哋嘅歌詞，跟住個flow都能夠非常投入，實在精彩。
