前幾若工，我坐捷運車頂的優先座，上邊仔的位。無偌久，有一个老母捒一个囡仔捒車起來，邊仔抑有一个量約仔二、三歲的查埔囡仔。In坐佇我的隔壁閣隔壁的位。
一坐落去，老母共車頂的細漢的換尿苴仔，尿苴仔換好，抱囡仔徛起來，欲穿褲，伸手共大漢的查埔囡仔拍一下，講：「坐好。」我才看著，伊覆佇椅仔頂懸，無坐予好。細漢的毋乖乖穿褲，一个人𤆬２个囡仔，２个囡仔哀來哀去，躘來躘去，老母有夠無閒。
我咧想，我欲共隔壁的少年查某囡仔講佮伊換位，予我佮彼个查埔囡仔耍無？想幾若分鐘，無法度決定。隔壁彼个落車，我換去隔壁的位，佮查埔囡仔坐隔壁。我佇我的揹仔底提一个我家己做的竹蜻蜓，共伊講：「這支這麼小，我們來玩。」本來是欲提去予我的查某孫耍的，因為古早是用竹仔做的，這馬會使用欶管佮紙片做。
我共手攑懸，用２个手蹄仔輾彼支欶管，放開，彼２片紙敢若直升機踅落來，大漢的誠歡喜，細漢仔的頭嘛越過來看，２个囡仔攏恬落來。我輾幾若擺了後，共大漢仔講按怎輾，予伊試看覓，伊試幾擺了後，就會曉，我講：「我轉一遍，你轉一遍。」有當時仔落佇椅仔頂，嘛會落佇塗跤，我向腰抾起來，彼个老母講：「不要掉在地上。」
我講：「那是不能控制的。」
竹蜻蜓自空中飛落來，規定二、三歲的囡仔袂使予伊落佇塗跤，老母的頭殼是咧想啥？我看著的是：囡仔誠𠢕，試幾若擺就會曉耍。
細漢仔欲徛起來，老母抱伊徛佇椅仔頂懸，細漢仔雄雄伸手拍大漢的頭殼，老母隨拍細漢的，我擋袂牢，共講：「你打他，他會學你打的動作，也打人家。」老母無講話。其實是老母攏用拍的，囡仔嘛學著。
伊閣講幾若擺：「不要掉在地上。」我應：「那是沒辦法控制的。」「我揀起來就好。」細漢的嘛欲輾，我予伊試幾若擺，猶輾未成功。
老母講欲落車，共細漢的囥佇捒車內底，我共大漢的講：「你喜歡嗎？這支送給你。」
老母講：「我要他不能拿人家的東西。」
我講：「這是小東西，給他玩，我可以再做。」我buaih插伊，查埔囡仔歡歡喜歡攑彼支落車。
（2026.3.6.）
教育部台語辭典，https://sutian.moe.edu.tw/zh-hant/
