頭前的註解：
￭這馬無咧戀愛，共進前寫的＜分手篇＞提出來貼，等待愛情來到；
￭這是2018年寫的；￭欲分手的人閣講遐爾仔濟，這到底有啥物天良矣！「天良」這个物仔原本就無存在，哈哈！
￭向望佇內底學著物仔，下一个會閣較好。
- - - - - --
我佮伊煞鼓，分手矣！阮鬥陣、做伙７年，伊猶是繼續來參加我的活動，佮台北的活動，將計劃中想欲做的代誌做完，一方面嘛陪伊紲落來好好仔過伊家己的日子。
分手的原因敢若毋是誠「普普仔」（其實是誠普通的，只是有的人處理的方式無仝），重點是，我經過分手的種種，體會誠濟，咧身軀佮心理上攏足食力的情形下，想著共過程寫落來，當作紀念，整理一下，看我會使學著啥物？猶閣有，好好仔結束，分開。
《頭幾若年》
一開始，我知影我佮伊有真濟的話題講袂來（她誠歡喜佮我啥物攏會使講），其他方面攏好勢好勢。彼當陣仔，我已經知影，佮一个人鬥陣，身佮心同齊佮意的機率無懸，我誠清楚這件代誌，袂有無實際的幻想（幻想我想欲有各方面攏滿意的愛人），閣再講，阮無蹛做伙，誠濟代誌毋免操煩，我逐禮拜去一擺南部，那做工課，那約會，鬥陣甲誠好。2011年佇左營稅厝。
伊不時做一寡仔後日仔的拍算，我攏無應聲過，我講：「後日仔會改變，我無法度用這馬的我，去為未來做啥物承諾。咱若這馬好，一直好落去，就會一直做伙矣！」
2012年，我台北的工作室成立。2013年，感覺按呢２爿走，代誌做袂好，閣再高雄的工課佮原本想的無仝款，袂使閣按呢矣！熱天的時，共高雄工作室收起來，規个蹛佇台北，變做伊有閒的時來台北，時間無一定，量約仔一月日來一擺，抑是超過一月日。台北是我家己的厝，一个人蹛，阮有家己的空間，毋免厝稅錢，嘛毋免開旅館錢，實在誠爽快。
無定定見面了後，干焦會使用電話佮line聯絡，這當陣仔講袂來佮溝通無好的情形就閣較明顯矣！我佇想，我年歲較大，賰無偌濟年，敢欲按呢守著伊一个人？開始考慮開放式關係的可能。阮無無好，無需要分手，我無滿足的部份另外找人就好。若毋知影開放式關係這種可能的人，一般的做法是忍耐、偷食，抑是分手。我已經知影這種無仝款的親密關係的方式，無需要分手。
《準備》
我佇2014年參加熱線的「開放式關係讀冊會」，想欲加了解一寡仔。本來拍算對伊隱瞞，以後新熟似的人先講好開放式關係。去讀冊會幾若擺了後，我想著隱瞞是無好的，果然下一擺讀的，冊頂懸寫到隱瞞是無好的，無彼个效果，而且感情袂當流通，會窒著……，嗯！按呢就準備佮伊坦白，講實在。欲按怎進行咧？當然是困難的，無管按怎困難，總是愛做矣！
我前後量其約仔想欲倚一年，佇2015年的年頭佮伊講。為了講這件代誌，我做真濟的準備，譬如 ：共進前沒講的話，沓沓仔講出來。我定定有話無講，煩惱伊會無歡喜，抑是心內艱苦，攏用「算了」凊彩準拄煞，其實有問題的代誌袂自動消失無去，下擺拄著抑是仝款困擾；
猶有，佮厝內面的人，抑有定定同齊做工課的好朋友出櫃，講我佮意查某，我有女朋友……。我發現，我佮一陣人講煞了後，就有人共我講：「我知道了。」
「你怎麼知道的？」我感覺誠意外。
「直覺。」抑是「不曉得聽誰說的。」是，有人是直接的感覺，抑有，我的朋友中間有幾若人知影，無知影是毋是in講的？抑是，我用我的本名寫幾若本女同志的小說，對遮來臆的。
原來是按呢！雖然我無講、隱瞞這件代誌，人嘛是會知影，毋是親像我家己想的，人攏毋知影，按呢我就毋免藏甲遐辛苦矣！拍算若是有人問我佮意查某無？我會看對方的情形老實講（到目前為止，猶無人直接問我，哈！）
原本２个面冊的迷眾頁（粉絲頁。本名的佮同志朋友的）辦的活動分甲真清楚，我開始共２爿的活動合做伙辦，真好，予異性戀佮同性戀，抑有跨性別的人當面講話、互相討論，同齊進行活動，促進２爿（異性戀佮其他性別）的熟似佮了解，可能有的異性戀一世人攏無機會遐直接拄著、熟似同性戀喔！因為普通的場合，人袂講出來，逐家攏當做異性戀。這是我做性別的方式。
《開始冤家（我認為是「溝通」）》
一般的人對親密關係攏想做「當然」是一對一，干焦會使一个人獨占對方一个、其他的人袂使佇「仝一个時間」入來分（換人是普遍的情形，毋過一擺干焦有一个愛人仔），對這種為了因應現代社會的人，對感情有閣較懸品質的需求的，名稱是「開放式關係」的另外一種形式，當然無了解，予人認為是烏白來、垃圾（lah-sap—污穢）、無道德……的，伊嘛按呢想，伊無了解、袂放心、規工冤家量債……
我嘛招伊去參加讀冊會辦的分享會佮看電影的活動，抑有後來非典小組一月日一擺的活動，對伊攏無效。伊攏用一對一的觀念批評，誠討厭遐的主持佮分享的人（伊講：「都是因為他們，妳才會知道開放式關係」，其實我已經知影10年矣！）。因為這件代誌是我提出來的，我有需要，我認為我有責任去解說、講清楚，就一直說明。幾若月日了後，我忝死矣！發覺伊完全無聽入去，就喝停，無愛閣講。
伊來台北的時，講伊心情無好，毋甘願，我為了表示我願意溝通的誠意，無欲放捒伊，佇台南租一間小套房，平常日仔去看伊（我佮伊攏是拜六、禮拜較無閒），２个人攏有閒的時，同齊去南部四界行行，𨑨迌，暫時停戰。
（華文寫於2018年;台文翻譯2026.3.）
教育部台語辭典，https://sutian.moe.edu.tw/zh-hant/
