佇最近兩个月，賴政府連紲提出真濟無仝的政策。頭先是講欲放寬予獨生子家庭，嘛會使申請著外籍家庭幫工。除了予青年輩有法度兼顧著工課佮家庭，嘛向望講𪜶會使加生囝；另外一方面，總統本人閣公開表示，因為台灣欠電，所以準備欲恢復核電廠運作；閣為著誠濟工課攏無台灣人欲做，正幾天勞動部拍算欲對印度引進移工。
雖罔講欠電、欠才、欠囡仔這三項代誌，看起來是無直接的牽連，但若是對這三个議題有閣卡深的思考，就會發現台灣這馬的困境，可能攏佮予真濟台派足驕傲的護國神山有所牽連。台灣為啥物欠電？相信原因讀者嘛已經真了解：因為台灣半導體佮 AI 產業當咧衝，所以需要愈來愈濟的電。加上這陣仔關稅帝君（川普）起痟/發駕去拍伊朗，影響著世界的能源供應；而且，中國佇戰時第一時間就欲封鎖台灣海運，嘛喝真濟年矣。所以，為著緊急時態、強化國家能源韌性，恢復核電的決定初初看起來是真合理無毋著。
毋過，對另外一个角度來問：為啥物半導體這款𠢕食電的產業有法度佇台灣發展？敢講毋是因為台灣電錢的俗是世界占頭名的？話講倒轉來，就是護國神山電食了傷雄，台灣才會欠電；賴總統對著台灣欠電，所以愛用核電的理路，根本是因果倒反。
造山運動除了靠著俗價的電，另外一个原因就是高素質、高學歷、無要求生活品質的俗工（護國神肝）。逐改看著財經名喙佮前行政官員咧供體外國工程師有偌貧惰、台灣的工程師有偌負責。像講台灣有地動的時陣，真濟人半暝閣駛車自動去廠區檢查。加班免錢、責任制免錢，是真濟台灣高階勞動力的狀況。佇這種高壓無健康的生活當中，誰有時間佮氣力生囝教囝？
對合法人工代孕到引進外國家庭工，敢真正有法度改善台灣長年的少子化問題？比起共照顧囡仔的責任擲予外國人，共爸母假加長到每一个人會使請三年（一个囡會使予爸母攏總請六年），而且到囡仔八歲進前攏會當申請，敢袂較贏？德國人就是按呢做呢！
護國山頂佮敗國山跤嘛是兩款無仝的生活，經濟的果子罕咧落佇山跤，青壯世代若無佇台積電相關產業吃頭路，趁的錢其實嘛無啥增加，但是物價因著各種的原因起袂停（其實全世界攏按呢），比較鬱卒感愈來愈深，就無想欲結婚佮生囝。閣加發幾擺一萬塊抑是減稅，邊際效果嘛會減少。
因為逐家的投資攏硩佇半導體參 AI，其他產業的發展對欲著陣，遐的員工想欲趁大錢就僫。多元的頭路若是斷去，有其他專業才調的人才就會出國發展，最後毋但是少子化，是對人口底數開始流失。
筆者閣會記得佇頇顢的馬英九時代，經濟䆀，人口外流嚴重合理之中。但是本土蔡政府無講出喙的是，這个趨勢完全擋伊無牢，佇 2019 年就有差不多得欲 74 萬的台灣人，毋是佇家己的國家咧拍拚食頭路。若是無後來的武漢病毒爆發，英國牛津大學本底是看衰台灣，預測咱島會佇 2021 年成作人口外流世界第一名，佇外流的台灣人，十个當中有六个是專業人才（參考資料）。
疫情了後，最新的統計佇 2024 年，人口外流的重新來到疫情後的高峰（參考資料），有超過 66 萬的台灣人出國食頭路。頇顢政府干焦知影對印度引進移工，煞無願意對根本改善台灣人才的困境。工總三不五時咧怨嘆講揣無工，敢有想過原因出佇干焦想欲用俗工的恁家己身上？
現此時的本土政府看起來是有咧做代誌，但是對長期來看，這寡政策敢有所顫悶？筆者是誠悲觀啦！尤其是欠電、欠才、欠囡仔的困境，是國家經濟產業根頭設定造成的，毋管請偌濟外國移工、起偌濟核電廠，攏是咧拆草刺補壁縫，根本就無真正顫悶著！
筆者本人對著賴政府嘛毋敢有真濟期待，想著伊彼當陣做行政院長創啥物一例一修，勞權的神主牌早就摒挕捒矣。啥物務實台獨，當選了後變做中華民國台灣。這改，連擋四十年的非核家園理想，攏會使講放手就放手。
毋知是毋是因為地緣政治下的台灣運命，毋敢放棄好不容易扶起來的護國神山，所以甘願擔著核災佮滅種的風險，為著眼前的生存。
(相關的論述的華語版：自由開講》缺電、缺才、缺小孩 台灣未來的隱憂)
