Ē kì-tit sè-hàn sî-chūn, pài 6 lé-pài sī tōa ji̍t, gún kui ke-hóe-á ē khì iā-chhī-á chia̍h-àm. Hit chūn-á chiâⁿ sî-kiâⁿ gû-pâi-koán, ho̍k-bū-oân kā gû-pâi hē tiàm toh-téng, khàm-kòa kheh--khiaih chìn-chêng, lóng ài seng kā chóa-kin-á gia̍h koân tī bīn-thâu-chêng, pī-bián hō͘ sio-kún ê iû-pho phùn--tio̍h, ìn-siōng tiong ài tò-ta̍h-sǹg sǹg 30 bió, chiah ē ēng-tit chia̍h, mā m̄ chai che kui-kí tó-ūi lâi--ê...

Chit-má gún tòa ê hū-kīn ū 1 tàⁿ bē o͘-lián--ê, put-sî ē khì ka kau-koan, thâu-ke kap in khan-chhiú (khòaⁿ--khiaih èng-kai sī ū tàu-tīn ê khoán--lah) mā lóng chia̍h kah ē jīn--tit-ah. O͘-lián tian-tò m̄ sī góa sè-hàn sī chin chia̍p chia̍h tio̍h ê mi̍h, chit khoán kō͘ ji̍t-pún hái-chhài tīm thng chú--ê liāu-lí, tian-tò sī chhut siā-hōe liáu-āu, siōng kah-ì chia̍h--ê.

Khioh-khí chia̍h gû-pâi, gún tau mā chin ài chia̍h jiû-hî kap hēng-jîn keⁿ, thâu-chêng kóng ê iā-chhī-á, lāi-té ū 1 keng biō, biō-kháu sī bē mī kap pn̄g hit khoán--ê, koh kòe hit tàⁿ to̍h sī bē ô-á-chian kap jiû-hî keⁿ, gún chha-put-to ta̍k lé-pài siōng bô ē khì hia chia̍h 1 pái. Lēng-gōa to̍h sī chhī-á bóe ū 1 keng lō͘-piⁿ tàⁿ-á, bē chhoe chúi-kiáu--ê, to̍h sī hit khoán Tiong-kok pak-pêng lâi--ê, chúi-kiáu-phôe ke chin kāu ê hit khoán, chá-chêng in 1 lia̍p lóng pau kah kài tōa-lia̍p, góa ē tàng 1 lâng chia̍h 20 lia̍p, kiàn pái gún bó--a lóng kiò góa m̄ thang chia̍h hiah pá, nā bô ē piàn tōa-kho͘-tai.