Ang-á phiau chit ê mi̍h-kiāⁿ m̄ chai koh ū gōa chē lâng chai-iáⁿ? Gún í-chá tha̍k kok-hāu-á ê sî-chūn, hāu-mn̂g chhut--khì, tùi-bīn kap piⁿ--á chhia-lō͘ koh kòe, chóng-sǹg chha-put-to 4, 5 keng "書局", kóng sī bē chu, si̍t-chè siōng góa kám-kak sī bē ha̍k-seng chhit-thô mih-á thàn siōng chē ê khoán. He hā-khò sî-kan, tiàm lāi-té bē su pah-hòe kong-si teh chò chiu-nî khèng-chiok, cheng-chha lāi-té lóng sī ha̍k-seng-á, kui kang siōng-khò liáu, sin-khu chhàu-mi-mo͘, 1 ê 1 ê lóng chiⁿ ji̍p khì lāi-té bé mi̍h-kiāⁿ. Lí kóng beh thài ē ū hiah chē mi̍h-kiāⁿ thang ta̍k kang bé? Bô kóng lí m̄ bat, he seng-lí lâng lī-hāi to̍h sī chia, siōng sî-kiâⁿ ê chhit-thô mi̍h in lóng tòe ū tio̍h, tiān-sī sin hòng-sàng ê bàng-gah--lah, bêng-chheⁿ siòng-phìⁿ--lah, koh ū A-tá-lih ê khah-phìⁿ... Lí kám chai-iáⁿ siáⁿ-mih sī A-tá-lih? He chit-má ná chhiūⁿ mā iáu koh ū, cheng-chha miâ bô kâng niā-niā, to̍h sī 1 chióng chóa-pâi-á, ài khì choan-iōng ê ki-khì "lù-khah", chhin-chhiūⁿ í-chá ê sìn-iōng-khah án-ne, ùi ki-khì tiong-ng 1 phāng kā lù--kòe, he ki-khì ē kiò 1 siaⁿ "A-tá-lih!", piáu-sī i chai-iáⁿ lí ê khah-phìⁿ sī siáⁿ-mih khoán--ê, koh lâi i ē koat-tēng siáng su siáng iâⁿ, nā sī lí iâⁿ, to̍h ē ùi siōng ē-kha 1 khang, cháu 1 tiuⁿ sin ê khah hō͘--lí. Khêng-si̍t góa kàu taⁿ iáu siūⁿ bô he tàu-té sī án-chóaⁿ siat-kè, goân-lí siáⁿ-mih lí-lō͘, án-chóaⁿ sǹg chiah ū hoat-tō͘ the̍h tio̍h khah ko-kip ê khah-phìⁿ, m̄-koh chit ê siaⁿ-im soah kì kàu taⁿ, jîn-seng lóng kòe 1 pòaⁿ khì--ah iáu ē kì--tit.

Ah he ang-á-phiau--leh? Khàu-iau--a, jī-sò͘ bô kàu ēng--ah, bîn-ná-chài chiah koh kè-sio̍k siá--lah.