台語文學

不意中共鬼王掠起來，挩窗毋敢傷靠勢，驚參龍鰲彼改仝款跤步閣踏錯，紲共風袋仔的喙口捏牢牢。

風袋仔內有光走出來，紅燄燄的光，挩窗看著鬼王的烏影，勼甲真細塊，佇內底傱來傱去。這咧時陣，去予挩窗擲入去的大刀、畫戟、火槍、蛇矛等浮出來，交鬼王手夯的旗仔相摃，戰甲乒乓叫。

挩窗掠做佇咧看皮猴戲。

伶俐的挩窗伊緊來開跤行，想講轉去大士爺廟，擲去觀音面頭前，凡勢危機就解除矣。伊對市仔後衝出去，倒斡來到雜間仔，就是路口的舞台區，閣倒斡直直挵去大士爺廟。

毋知按怎，伊感覺手底燒燒，瞭一下，哇咧！風袋仔袂輸火紅色的鼓仔燈，溫度雄雄衝懸，姑不將共𫝺掉。

落塗的風袋仔若大粒卵徛踮塗跤，對火紅色轉做金黃色，閣成做紺色，落尾是烏趖趖。挩窗氣禁起來，做好準備，等待鬼王啄蛀而出。

真是料想袂到，伊竟然看著地獄。