落著霧雨个森林 佮 電動實況
昨昏我咧實況《落著霧雨个森林》這个類 RPG 製作大師个解謎電動，若踮水管查，會當看著足濟人實況過這个電動，佇我个印象中，類 RPG 製作大師解謎佮實況个時行，攏是對《Ib》開始。
一般 RPG 愛戰鬥訓練角色，訓練个過程無啥物好看，解謎 RPG 个故事較重，解謎个過程嘛有趣味，干焦想欲看故事个雲耍者嘛看甲歡喜。而且大部份个類 RPG 製作大師電動攏是免費，共實況囥去網路頂較無版權个問題。
解謎本來就是我誠有興趣个主題，除了《Ib》以外，較有名个《魔女之家》、《狂父》⋯⋯我攏有耍過，猶閣有我誠佮意个《人魚湳仔》、《怪異症候群》⋯⋯毋過毋捌實況過。較早顛倒是耍《Outlast》个時陣想過欲實況來驚人XD，毋過彼个電動予我 3D 眩傷嚴重，耍一、兩遍就放棄，了後幾若冬攏無想過欲實況。最近拄仔好幾个朋友攏實況過，《軒轅劍七》个試耍版、前一站仔有名个《守夜人》、最近轟動个《天穗之佐久命公主》⋯⋯
予我行出一步是因為《薄櫻鬼》，我咧耍个期間，若耍了一條線就會佮一个朋友仙女姊仔哀哀叫。因為我一直共伊講愈來愈佩服土方先生，予伊開始有興趣，我才想講欲耍予伊看。若欲開實況上驚个就是無人看，家己佮空氣講話感覺足好笑，所以若是確定有人欲看，我會較敢開。了後台語寫作佮翻譯討論會个朋友招欲耍《among us》，嘛有開實況，我電腦是筆電，走起來有夠 lag，煞想講下回來開單機个，看會較好無，才開始這个計畫。
頭前講過，我其實誠愛這類个電動，足早進前就捌耍過《落著霧雨个森林》，毋過彼陣干焦通過一个結局，到這馬攏總袂記矣，干焦會記得足佮意男主角。昨昏按呢耍落來，就了解是按怎這个電動遮有名，伊个角色性格誠明顯閣古錐，故事悲傷予人印象深，耍个時陣恐怖刺激（後壁予鬼逐个時我一直操姦撟XD），這款電動會予人歡迎个原因攏有矣。
我家己印象上深个是內底有一个房間，鬼佇中央行來行去，畫面會一直跳紅字出來，一開始我走入去提物件閣隨走出來，了後發現若莫行到中央，鬼嘛袂來共你掠，才徛佇門口共遐个字看予了。彼就是知影故事真實面个開始，伊嘛無講發生啥物，干焦共發生个時，彼種痛苦哀出來，予你去臆講發生啥物代誌个時，嘛會當去體會。
昨昏嘛是干焦耍著一个結局，煞來應該會共其他个通了，但是就袂實況矣，賰个就予逐家家己𨑨迌。
