２工前，佇便利店買早頓，120箍，想講第二工需要５百箍的銀票仔，就提一千箍予找，心內佇算，伊愛找我８百幾箍，閣想到皮包仔內底有20箍的銀角仔，那撏那講：「我有20箍。」共20箍予伊。
我提到伊找的錢，無五百箍，原來攏是一百的，我量約仔看一下，８張無毋著，攏總看２遍。
轉來到厝，想到毋著，閣共遐的銀票仔提出來算，８張，我想毋著矣！我有予伊20箍，應該找９百箍才著，減１百，了去矣！伊是刁工的，抑是算毋著？
我頭殼內底貯的是頭一擺想到的，伊愛找我８百幾箍，嘛是逐擺欲找的錢（慣習的），第２个動作，我予伊20箍的代誌，完全沒印佇頭殼內底，誠害。
有當時仔，干焦記著第２新的代誌，對上新的彼个版本沒印象。請問，年紀較濟的網友，有人有這个症頭無？
