2025.1.15.
＜無，in欲佇厝內靠老爸？＞
—礁溪龍潭村，是倚欲60年前的代誌
我小學六年的下學期自礁溪國小轉去龍潭國小，阮老爸是警察，阮蹛佇派出所邊仔的宿舍內底。無偌久，台旭佮台麗工廠起好，開始招工人，真濟少年的查某囝仔去報名。頭一年閣愛考試，考煞出來，有人咧講：「我攏袂曉寫。」
開工了後，有２个開始佇工廠上班的查某囝仔講欲來派出所借蹛，可能in兜的人有熟似派出所內底的人，辧公廳無房間, 佇邊仔角凊彩睏一暝。隔壁的oo-bá-sáng共阮兜講：「in食燒餅油條，一頓２箍，一工３頓６箍。」
我問阮老母，in是按怎欲按呢？老母講：「無，in欲佇厝內靠老爸？」當時我毋知影這句話的意思，厝內蹛好好，是按怎袂使蹛？
原來大漢了後, 要家己出來賺錢, 想辦法過日子。
— — —
2025.1.17.
＜燒水沖甲飽＞
—龍潭村，倚欲60年前
無偌久，工廠有宿舍通蹛，較遠來的蹛宿舍，附近的，逐工佇我兜頭前的大路騎跤踏車來來去去。
阮老母講：「in講宿舍蹛甲誠四序，洗身軀的燒火沖甲飽。可能in艱苦底。」
彼當時仔，龍潭村猶無水道水，我兜愛用水拹仔拹水（
Īng tsuí-hia̍p-á hia̍p-tsuí. 華文：用手動抽水機抽水。
阮講的是日語的pump，查無欲按怎寫？）
用雙手揤一支安佇pump頂懸的棍仔，共水拍起來，用捾桶仔捾入去灶跤，倒入去水缸內底，逐工愛捾水，才有水通用，我的阿兄佮小弟𪜶 （in）輪流捾水。
若蹛庄跤，應該攏無水道水，若欲洗身軀，愛用大灶燃燒水，捾去浴間仔洗，佇工廠的宿舍內底，有澆水通沖甲飽，嘛是一件誠幸福的代誌。
— — —
2025.1.20.
＜粿愛做無甜的＞
—龍潭村，咧欲60年前
阮蹛佇龍潭派出所宿舍，後壁有一个無偌大的埕，埕的邊仔種一排竹仔，竹仔彼爿是一家農家，大家庭。
過年過節做粿的時，𪜶 （in）兜做２種，有甜的佮無甜的，因為扞家的大官講糖貴，袂使摻到有甜，加開錢，米是家己種的，毋免用錢買。
無甜的粿人無愛食，逐家想出一个辦法來，做２種，一種是有甜的，逐家食，一種是無食的，干焦大官食。大官欲食的時，攏是其他的人提予伊食的，干焦伊一个人毋知影這件代誌，連阮新搬去的厝邊仔嘛攏知。
講伊儉，是誠好的習慣，毋過錢省到這款程度，逐家無法度接受，自然想出應付的辦法來，唉！
灶頭毋是伊咧扞，毋知影人按怎舞，想講粿無甜就是儉錢的代誌。
