有一年，拄好咧選舉的時，阮兜有代誌請親情食飯，阮老母請一个伊外家的親情來同齊食。食飯的時，伊為伊的果果黨搝票，伊有選贏的責任。阮兜親情有一對少年的翁仔某干焦聽伊講，沒表情，嘛無講「好」，伊攏總講３擺，閣徛起來敬酒，請in投某某人，閣講「西瓜倚大爿」。我誠佩服彼２个少年人，原來無同意的代誌會使按呢表達，若我，就清彩應：「好」，尤其對長輩。
伊以早倚國民黨，幾十年了後換倚中國，一个查某囝嫁中國人，後生佇美國冊讀煞就去中國食頭路，伊家己退休了後去中國佮人同齊投資工廠，落尾收起來的時講「無了無趁」。
伊對果果黨失去執政權，到這馬猶未慣習，不時找機會講政府的歹話，像：疫情取消限制了後，聽伊講：「他們現在不管你了！」我心內想，你若確診，病院、衛生中心嘛仝款提供服務，我只是貧惰共伊講，好佳哉，我誠少拄著伊，毋免聽伊講遐的有的無的話，伊過年期間請食飯，我大部份攏無去，阮阿兄、小弟去就好。
咱買物件，發覺佮原本想的無相仝，抑是無合用的時，會使換，嘛會使退貨。選舉出來的公職人員嘛仝款，會使選予伊牢，嘛會使罷免。
有消息，新北市新店區羅明才，許美華的面冊，昨昏6/25：「賀！新北羅明才罷團「拔羅波」順利送出補件
需要補件564份，罷團超高標送出2035份」
真正恭喜，我放心矣！阮厝內的人有２个會當投票。嘛是我的親情彼區。In遐一寡仔人鬥陣舞建築趁錢，我共一个蹛新店，佮彼个親情的親情表妹講：「立委換人做，地方的資源才會讓新店的居民得到。」
（我嘛驚伊的查某囝看著，上好有看著，閣有耐心看台文，若無講，in攏想做阮兜的兄弟佮in支持的人仝款。）
（2025.6.26.）
