黃昏的故鄉總是美麗--ê，咱思思念念ê田岸邊，細漢做伙
chhit-thô 時 ê 伴，咱上懷念 ê 彼段日子，已經無法度koh轉來--ah!
想起彼當時你共我講 ê 甜言蜜語，咱細漢 ê 記持，猶敢koh佇--leh?你bat對我講起，未來你會chhōa我做某，這句話，我koh teh考慮咧?你敢是講認真--ê?
阿昌你從來毋bat對我講白賊，毋過你 ê 甜言蜜語敢是真--ê?我真giâu疑，因為我會記得，佇故鄉 ê 時，我耳空輕，彼時聽講你嘛有對pat的查某講過你真愛伊彼種話，毋過當tong我問你 ê 時，阿昌你共我講:「你莫聽別人烏白講，he毋是真正--ê，你聽聽ê就好!」
我就想講，「好!我聽你--ê!」，毋過最後抑是我失算，你 ê心早就無佇我chia--ah!你已經早就相好你想beh愛 ê 對象，你 ê 欺騙，我是這世人攏無法度原諒--ê，我親愛 ê 故鄉，美麗 ê 故鄉，是按怎一 ê 美好 ê 記持，因為阿昌，就按呢毀掉我對故鄉 ê 愛!
深深 ê 愛，我bat愛過故鄉kap你，是同齊 ê 代誌，毋過因為你 ê 放sak，予我失去對你 ê 愛kap信心，我全部全部 ê 氣力，就囥佇我做藝術家 ê 工課，用藝術寫作來思念，思念你對我 ê 愛，思念咱過去 ê 美好，我這馬無法度用言語來形容任何代誌!我 ê 故鄉，高雄，是一 ê 美麗 ê 海港，我若心情無好，攏會去看西仔灣，美麗 ê 景緻，是用言語無法度比並--ê!我只好放下，我只好祝福，我只好共我chhun--ê氣力，來成全我 ê 藝術工課，我干焦愛阮兜 ê 人kap藝術 ê 工課!
我無法度koh失去chia ê 人事物，我會向前行，共你放bōe記得!咱再會!
*刊登tī 歌仔冊NO.5(2025/7月)
