那款早起頓那聽 la-jí-ooh 聽著主持人請教無按起頭收聽所致這久無才調按伊 ê 回答來斷定（tuàn-tīng），受訪者是出版社或是作者「以降價 ê 方式來揣新讀者，你認為伊 ê 應效如何？ 」
「彼是治標無治本 ê 想法，起因現此時 ê 利便改變閱讀 ê 定義」我耳那聽受訪者回答，喙 mā 跟綴回答「價數無重要，重要 ê 是冊帶來 ê 價值，抑無伊 kan-ta 是美麗 ê 符號，像 Anne with E Jerry Baynard 分張 hōo Diana Barry 閱讀 ê Frankenstein。」台灣目今 ê 閱讀環境成做如何，倚 bueh 十冬無轉去 mā 無 teh 使用任何社群媒體 ê 我無法度以自身觀察做舉例，不而過以人 tī 德國來來去去到家甲做踮遮 ê 觀察做舉例，以一台客滿 ê 車幫有 7 ~ 8 成 ê 人頭犁犁專心閱讀轉做無夠一成 ê 閱讀變化，德國 uī-tio̍h 救冊市所做 ê 調整確實宛然廣播節目受訪者 ê 悲觀，有發水泱（iann）m̄-koh 無久長，畢竟 Radi 是 Rettiche，Rüben 是 Rote Beete ê 無宛 2 體，tuì 愛食菜頭類 ê 人來講，無論𪜶 ê 稱呼按怎改變，喙斗 buē 若「阿英都無愛你矣，你猶閣綿死綿爛咧求伊，你哪會遮戇啦！」，冊價降稅金按 7% 轉做 19% 龜跤龜內肉，大丈夫。
聽廣播討論向時行 tī 路裡是一塊看板無細膩落落來隨摃著閱讀行路人，這久是滿天看板四界落猶是摃 buē 著閱讀行路人，我 mā 拄好無閒咸豐三，講到今 ê 出聲哼呻 mā 感覺𤺪 ê 料理。
價數無重要，重要 ê 是冊帶來 ê 價值 --- 我拄拄好 teh 料理，準做猴齊天拄著如佛來，變無輾 mā buē 撏錢去投資 ê 食譜冊料理。
好奇心刣死一隻貓，uī-tio̍h 知機 Maultasche 伊 ê 歷史背景敢有延續， tuì 食譜冊是一个錢拍 48 个結 ê 我冇手甲連家己 mā 感覺成做邱罔舍是一項好投資，紲落來 ê 日子宛然這久設定 ê 20 分鐘，電烘箱開始唱歌 hōo 我聽，我 mā 唱歌 hōo 問啥攏應 keine ahnung m̄ 知影 ê gún 翁聽。
「冇手換答案 mā 是非常 lohnt sich（大碗閣滿墘）」gún 翁笑微微那享受自囡仔就認捌 ê 菜色，那 tuì 我𤉙 mā 是踅冊市無愛投資 ê 雞湯。
確實，向望厝內有玫瑰田卻 m̄ 願手䘼撆起來骨力拍股栽欉，有機會見著向望是得著一隻豬（Schwein gehabt 好字運），無機會是自然，感謝 lohnt sich 引𤆬我認捌 m̄ 捌接觸 ê 階層。
一座庇里牛斯山分隔西班牙交法國 ê 氣候，本底若烏狗兄熱情 ê 日頭 tī 霜降後 mā 沓沓仔行入換年時寒時熱 hōo 我若 teh bué 彩券，總愛等到伊正港來行踏 tsiah 知影今仔日出 ê 菜色交伊有對同無，畢竟我 tuì 翁 ê 愛準做迒過太平洋來到大西洋，我 ê 脾土到今猶原是烏水溝，僫泅到𪜶 ê 東北海，交伊日日幸福食生冷。
「Tī 若小雪 ê 日子食這味，上敆喙」翁手那焐烘瓷仔那講，我 ê 頭殼 mā 閃過十外冬前對面厝邊翻厝，來遮做客鳥牽手 ê 我一个人坐 tī 無日鬚行踏 ê 角勢那食沙拉那想辦法敨熱，對面一陣建築工程實習生坐 tī 無遮閘 ê 角勢心靜自然涼自在閱讀，「你感覺 hōo 西班牙人講德國人想傷 tsuē ê 慣勢➀，敢有法度踅轉去一轉角就搪著尼采 ê 年代？」，我問食甲喙角變菱甲 ê 翁。
「你搪著 ê 少年人𪜶按怎享受 TikTok」伊問。
「一支短甲凡勢無十秒 ê 影片，𪜶看無 3 秒就換片」我講。
Gún 翁動一下仔鴟鴞肩來表示，按呢我就知影答案矣，無論冊價按怎調整，德國冊市搪著 ê 頭疼交臺灣相𫝛，準做降價水泱猶原僫楦闊。
向時僫得 ê 平等呔討行到這个地步？
挖一湯匙肉敆酸酵母麭，頭殼踅轉去 Die Deutschen 虔誠又閣認真寄付 ê 婦人人𤆬致心向服務神 ê 查某囝去修道院請求修女收伊做學生 hōo 伊跟綴伊 ê 跤步服侍神。一間修道院無民間 ê 寄付僫得延續，所致修女骨力轉彎踅角好禮向婦人人推辭，婦人人畢竟是世俗人無法度理解修女 ê 挨推，修女放棄踅金龜磨直接回應「神 kan-ta 接受貴族 ê 服侍。」
咱平民老百姓按修女講 ê「階級」變化到今咱總算交𪜶平權 ê 短短幾百冬，人類敢若猶原較愛《驚驚袂著等》「彼个國家的人民大部份毋捌字，所以無用選票，是共珠仔囥入去有貼候選人相片的票箱，選完了後才共珠仔鋪佇有空的水泥板頂頭計算，板有兩百个空和五百个空兩種規格。當然珠仔較濟的人贏。➁」，一想著這我感謝家己有機會受栽培，畢竟 m̄ 是每一个人有機會受栽培。另外，本底無法度敨放 ê 罪惡感，認為家己是閱讀歪喙雞無好 ê 想法，自彼日 tī YouTube 聽「我靠閱讀改變了一生」講故者瓦基 ê 這段話「無佮意就莫讀」，我總算消敨這个 hōo 我捎無摠 ê 情緒叨撚，呔討遮爾仔無禮貌一搪著人講食譜冊，我 ê 神魂隨走甲賰一个空殼 ê 無禮貌。
冊櫥空間有限，四常 buē 閣翻頭相揣 ê 冊，準做按臺灣來 mā 慣勢 kā 伊送去無料分張冊櫥交人結緣。這本 buē 敆喙 mā 是唯一一本撏錢投資 ê 食譜冊，我需要時間消化伊獨獨一本捙拚過德國花車價 ê 四本小說。
➀ Ich bin dann mal weg，作者 tī 朝聖之路搪著 ê 點拄：順其自然莫綿精。
➁ 劉靜娟的台語時間《驚驚袂著等》之〈用珠仔選總統〉
