人真係好化學，我媽咪上個月18號入醫院，到琴日就已經長埋地下。死之前幾個鐘，仲有好多親戚朋友探佢，仲識傾計食嘢，跟住搶救後就死咗嘞。
係有啲唔捨得嘅，雖然有好多事情我同我阿媽嘅價值觀唔一樣。而家諗返轉頭，呢個可能係最好嘅結局，嚴格嚟講佢只係辛苦咗大概3日左右，死之前都神志清醒，應該係冇痛咁樣離開嘅，血壓低心臟停，跟住就急救後死亡，我相信佢應該感受唔到好大嘅痛楚。同埋我老豆喺舊年11月就不被續約，正式退休，咁總算喺我阿媽最後兩個月都有我老豆日日陪住。我阿媽走咗之後，我總共見到佢三次。第一次係見病理科醫生時要認一認佢，第二次係前日喺醫院接佢返嚟，又認一認佢，同埋琴日大殮前瞻仰遺容。
第一次見佢嘅時候，我哋3個都覺得驚訝，因為其實佢個樣係比佢生前更好，佢係微笑緊，面色唔差。第二次見佢，因為又已經過咗一星期，所以個樣有少少變化，縮水咗，微笑嘅感覺細咗。到最後瞻仰遺容，因為已經有化妝師幫佢化咗妝，反而我就覺得係冇咁好睇嘅，唔化仲好睇化。
關於報夢，我家姐夢到佢返過嚟屋企。我都夢見過佢一次，個夢境就係我同家姐喺個廳度等佢返嚟，其實都知道佢死咗，就等佢返嚟。跟住佢喺門口出現，我開門俾佢，佢入咗嚟，佢個樣就係灰白色冇曬皺紋，個樣年輕啲嘅，跟住我捉住佢隻手問佢‘’你點啊‘’？佢話‘’我去法國住‘’，跟住佢行前兩步就消失咗啦。
我覺得可能麗麗都知道咗了，因為我阿媽個死黨有個朋友，其實就係麗麗嘅姑媽，咁佢姑媽都有嚟靈堂。
今年過年，我哋屋企都自閉，唔方便去人地屋企。
