話說我老母上星期日唔舒服，佢心臟衰竭，成日都心口嗌住嗌住，同埋佢星期六晚已經開始排唔到尿，我就叫老竇坐的士送佢去瑪麗醫院，因為之前每次入博愛冇乜料到，住兩日又講佢出院，瑪麗醫院始終同葛量洪醫院有聯繫，而我阿媽個心臟起搏器喺葛量洪醫院做嘅， 我就話搏一搏啦。坐的士去急症室瑪麗醫院。
跟住當日就入咗瑪麗醫院啦，星期日晚同星期一晚我都有去探佢嘅，到星期二晚我好忙，所以冇探佢，返到屋企我都9點幾10點，收到佢電話，又話好掛住我想聽我把聲，咁我都預計星期四先至再會去探佢，點知當晚我沖完涼瞓覺瞓咗一個鐘頭， 半夜12點04分，收到我老竇電話話，醫院打俾佢話佢呼吸唔到，插咗後叫我哋即刻趕去醫院。咁跟住佢就開始插住呼吸機，同埋身上面插咗好多喉，因為佢唔舒服，所以又要綁手綁腳，大字型咁驚佢用隻手搞啲儀器。
跟住到星期四早上8點鐘，我返緊工，又收到我家姐電話，又話醫院打咗電話俾我老竇，話佢心臟頓咗20分鐘，CPR急救完又要我哋趕去醫院。
我阿媽插喉期間就落咗迷藥溫溫燉燉，都但係都有好多要求㗎，佢講唔到嘢，但瘋狂掙扎，啲眼神又鬧人。到昨天，終於都甩到個呼吸機，開始可以講到嘢，又開始好多要求，狂鬧人，話護士衰。
佢昏迷期間，醫生都有問我哋，如再轉差仲急唔急救，咁我哋三個都覺得唔想佢再辛苦，同埋好多阿姨全部喺晒度，都覺得唔好再急救。但之後佢醒返，神智好清晰，我家姐就覺得如果佢神智咁清晰，就應該由佢自己本人決定返急唔急救，而唔係我哋去剝奪咗佢被救嘅機會。咁我都同意嘅，如果佢真係完全冇意識，咁就我哋幫佢決定啦。咁我哋琴日趁佢清醒時，就問佢急唔急救啊，如果情況再轉差，咁佢話要諗幾日。
其實我哋本身係去緊旅行，但係因為佢咁都冇辦法去啦。取消個旅程而家睇吓claim傾到保險攞返啲團費。
仲叫我係早1日先同阿香港，我做唔到佢姊妹，我都真係非常抱歉，佢星期四早上心臟停頓，星期五阿香結婚啦。唉，我都好唔好意思。
