河邊有２條橋，自我遮過去，正手爿的是Ａ橋，倒手爿是B橋。昨昏我行過A橋，閣再行頭前一下仔，斡正爿，行落去河邊。行一點仔，無想欲行久，猶閣愛去市區，就佇Ｂ橋邊仔的樓梯𬦰（peh）起來。Ｂ橋行落來正頭前的巷仔看起來恬喌喌（tiām-tsiuh-tsiuh），我就行入去，２爿攏是公寓，一樓有一半間仔店，店真少。
落尾行出來是大馬路，原來已經行到Ａ橋過來的馬路頂懸。正斡，看著Ａ橋，佇Ａ橋的正手爿，我看著彼工看著的涼亭囉！原來是佇遮。我行起去，看一眼行落去河邊的樓梯，原來我彼工行的是Ａ橋，毋是我想的Ｂ橋。彼工樓梯行落去，行河邊的小路，無發覺頭殼頂行過B橋。彼條細條路行到底，無路矣！越頭行轉來，佇Ｂ橋邊仔𬦰（peh）起來，揣無彼的涼亭，感覺誠奇怪，想講我行過一段「桃花源」。
彼个涼亭一定佇咧，我閣再去Ｂ橋行幾擺，揣無，攏想無，就是無想著去Ａ橋揣看覓。雖然我已經儘量共硬化、慣習遮的想法敨開，比進前較軟㽎一寡，看這件代誌，遐的硬化、慣習猶有，干焦想著一件代誌（一直想講我行的是B橋），無攑頭看四箍圍仔，想看覓其他的可能。
猶閣有，我的頭殼內底的地點囥毋著。
Ａ橋進前我有行過，因為欲行落去河邊，攏行正手爿，毋擺行過倒手爿。頭殼亂去彼工我「想講」我行的是B橋，Ｂ橋行落去河邊愛行左手爿（正手爿無路），所以我行左手爿，就看著其實是A橋，我毋捌看過的景象。越頭行倒轉來，揣無彼个涼亭，想講我行過一段「桃花源」，予我驚一趒，唉！
（華文2026.04.11. 台文翻譯2026.04.15.）
查字典，https://sutian.moe.edu.tw/zh-hant/
因為這篇
