愛得著大眾个支持佮了解，你个要求才會昇華做政治性个力量，會當通過政治个路去解決問題。假使你若毋管這个程序，拍算用無予大眾支持个政治力量去解決問題，按呢就佮經由權力去施展个暴力仝款。——《暗蟬咧哭時・皆殺篇》
今年，《暗蟬咧哭時》个新動畫佇十三年了後重新出發，當初我賰皆殺篇佮祭囃篇無看（莫問我為啥物，我嘛無了解我家己），想著欲看新个故事，驚看無，煞來補進前無看个，就對祟殺篇佮皆殺篇開始。
這是沙都子（Sa-tho-kho）个故事，一个爸母過往、阿兄失蹤、予阿叔苦毒个囡仔，伊猶原是 oo-thah-khu 愛个小妹，佇伊身軀頂發生个代誌煞真實甲予人心酸。做主角个圭一（Khe-it-tsi̍ｔ）嘛干焦是一个十七歲个少年，就算伊會當予沙都子阿兄个愛，踮這个社會中伊啥物攏毋是，祟殺篇就是欲予咱知影一个無主角威能个主角會當偌無奈。
我已經相信欲救沙都子無望个時，龍騎士 07 用皆殺篇展示伊心內个正路予逐家看，伊用故事表現頭前我抄落來个這段話。圭一聯合全部關心沙都子个人，撼動雛見澤（Hi-na-mi-ja-oo-ａ）上有權力个人，予伊出面催政府處理——真正是大人世界个規矩XD
用少年个心佮大人个規矩才會成奇蹟——這是皆殺篇最後留佇我心內个代誌。
另外，鷹野（Ta-ka-noo）小姐佮富竹（Thó-mi-ta-ke）先生个故事我嘛誠佮意，真正是相愛相殺，原本我掠做干焦富竹先生咧佮意鷹野小姐，後來才知影根本就睏鬥陣矣！發現講兩人無仝路了後，富竹先生毋願叛背家己个目標、綴鷹野小姐去害人，鷹野小姐顛倒歡喜欲共愛人刣死，看兩个相拍有夠芳（？）。
正經个佮無正經个攏講了矣，《暗蟬咧哭時》猶閣有潰暇篇佮祭囃篇，等我補了會閣來開講。
這是我古早古早寫个「鬼隱篇&罪滅篇」佮「綿流篇&目明篇」感想，彼當時盍會遮濟話通講？敢講是因為我對沙都子較無興趣？
