這本冊 tī 我這个連蠓仔攏無 bueh 來行踏 ê 部落格 m̄ 知出現過幾擺，tī 愛料理 mā m̄ 知影喋過幾仔斗就知影我偌佮意伊。
我佮意伊若 teh 佮厝邊頭尾破豆 ê 筆尾 mā 佮意伊敢若哲學家 ê 自我對談。一切自自然然，無任何 ê 虛華 --- 我 ê 意思是揀字寫揀字講。
寫著虛華 mā 是我頇顢倒吊無墨水，sóo-tí tsuē-tsuē 字讀有 m̄-koh m̄ 捌半撇，無論華文抑是台文，總是猶是愛講華文字較好揣資料。
我講 ê 華文字較好揣資料 m̄ 是講台文字冷僻抑是豆腐字，起因遮 ê 問題 tuì 我來講攏 m̄ 是問題。
比論講「挨拶」ê「拶/satsu」我是按日文學著這个字，華文 buē 曉講使用倉頡輸入法 ê 我猶原有法度迵過「手女女弓」kā 字拍出來。
台語字 ê 𠢕、勥、𪜶無法度使用倉頡輸入法猶原無要緊，起因有信望愛台客語輸入法佮PhahTaigi台語輸入法通使用。
按呢 ê 無精差是按怎 bueh 特別寫一段?
這自然有我 ê 經驗。
華文字行過百冬所謂 ê 借字 a.k.a「錯別字」抑是 tsuē 音字 a.k.a「破音字」定性甲真僫閣振動，加加 kan-na tshan-tshiūnn 現此時 ê ㄍㄠ ㄌㄧˊ ㄘㄞˋ 我學著 ê 講法是ㄍㄠㄌㄧˋ ㄘㄞˋ 按呢 niā-tiānn。
台文字按教育部辭典到今猶原無定性，我講無定性是按我手頭 ê 台文冊來比論，tshan-tshiūnn 拍氆(殕)仔光、枭疑(憢疑)、掣(𤆬)我遮 ê 文字若 m̄ 是我本身就捌這个語言有法度自動理解意思，猶無遮 ê 台文字就敢若法文，有看讀無 mā m̄ 知影意思。
我足佮意這本冊 mā m̄ 知影寫過幾百回，總是我想捌模仿「做一个母語作家是人生上好 ê 投資」來寫我 tuì 這本冊 ê 意愛「無驚驚袂著等，是我上好 ê bué 物經驗。」
我知影 tsuē-tsuē 人 teh 推捒台語文翻譯文學，總是外國文學猶原是外國人 ê 物件 m̄ 是咱家己 ê 物件，tshan-tshiūnn 讀 Ich bin dann mal weg von Hape Kerkeling ê 這逝：
我 ê 進香之路會經過 Camino Francés(西班牙語:法國之路)....伊是伊比利民族偉大 ê 傳教師。假使我 kan-ta 愖這件代誌我愛行 luā 遠，我 ē-tàng 隨歇睏2禮拜。
Ich bin dann mal weg von Hape Kerkeling
這段話 tuì m̄ 是出身 tī 腓尼基公主 m̄ 知按怎佮一隻白色 ê 牛公做伙出海𨑨迌到 Crete 紲落來 m̄ 知按怎生一个查埔囡仔，然後成做一个大陸 ê 地理無感覺，若 bueh 講有啥物感覺就 tshan-tshiūnn 我 uī-tio̍h bueh 寫歐洲(Europa)這个名按怎來 ê 展風神 niā-tiānn。簡單來講，規段文字 kan-ta 假使我 kan-ta 愖這件代誌我愛行偌遠，我會使得隨歇睏2禮拜 hōo 我有感覺，有感覺因為我 mā-ē 按呢做。
是講，我 mā m̄ 是講 m̄ 免翻譯外國文學，總是伊確實較激 buē 出咱家己 ê 記持佮氣味。
我 m̄ 知影咱愛讀外國文學是受著日本現代化 ê 影響抑是咱自本就愛〈美白〉 --- 皮膚 kā 變 hō͘ 白，鼻仔 kā 變 hō͘ 挺，改變外表 bē 輸仝時就 ē-tàng 改變家己 ê 身份？
低路人我毋知(mˇ diˊ)總是我知影Ich bin dann mal weg 猶原比 buē 過〈三日無餾〉ê「餾」佮「熥」𤆬 hōo 我 Schön 佮 Schee➀(schwäbische) 閣較深 ê 印象，起因伊是我神魂內底 ê「菜櫥有暗頓，我若較晏轉來你就家己熥來食，知 m̄」 ，tshan-tshiūnn〈買你保險的人攏真衰〉伊引𤆬我想著向時搪著賣保險 ê 朋友歹勢講出喙 ê 話「你 ê 關心佮好意是按怎聽起來遐爾仔成咒讖。」
《驚驚袂著等》無 Venezia 華麗 ê 妝娗，伊 kan-ta 有一片白爍爍 ê 雪順四季湠做水珠恬靜無味按瑞士行過德國、法國、荷蘭押尾佮北海相攬育飼各種物種。
我足愛遮 ê 白汫無味 ê 豐沛，向望有一日有機會繼續遮 ê 四常。
➀ 德國通用德語文佮在地語文攏是美麗、美好、媠 ê 意思。
2023.05.21
