詞、曲：蔡依玲 編曲：淺堤
溪海掠無魚 土地種無果
人出世落塗 仝款歹趁食
美麗ê海岸 笑笑共阮講
阮ê心振動 無像我 無像我
Khe hái lia̍h bô hî, thó͘-tē chèng bô kó
Lâng chhut-sì lo̍h-thô͘, kāng-khoán pháiⁿ thàn-chia̍h
Bí-lē--ê hái-hōaⁿ, chhiò-chhiò kā gún kóng
Gún ê sim tín-tāng, bô chhiūⁿ góa, bô chhiūⁿ góa
阿媽𤆬咱行 黃牛共咱扞
樹仔借咱踏 看天地袂驚
軟塗閣深掘 屈咧袂曉行
窗仔內ê鳥隻 飛袂振動
A-má chhōa lán kiâⁿ, n̂g-gû kā lán hōaⁿ
Chhiū-á chioh lán ta̍h, khòaⁿ thiⁿ-tē bē kiaⁿ
Nńg-thô͘ koh chhim ku̍t, khut leh bē-hiáu kiâⁿ
Thang-á lāi--ê chiáu-chiah, poe bē tín-tāng
溪海掠無魚 土地種無果
人出世落塗 仝款歹趁食
美麗ê海岸 笑笑共阮講
阮ê心振動 無像我 無像我
Ke hái lia̍h bô hî, thó͘-tē chèng bô kó
Lâng chhut-sì lo̍h-thô͘, kāng-khoán pháiⁿ thàn-chia̍h
Bí-lē--ê hái-hōaⁿ, chhiò-chhiò kā gún kóng
Gún ê sim tín-tāng, bô chhiūⁿ góa, bô chhiūⁿ góa
青面獠牙 飼𪜶大漢 一工閣一工變化
後代囝孫閣煩惱食穿
問伊敢知影 佗位是你ê厝
Chheⁿ-bīn-liâu-gê, chhī in tōa-hàn, chi̍t-kang koh chi̍t-kang piàn-hòa
Āu-tāi kiáⁿ-sun koh hoân-ló chia̍h-chhēng
Mn̄g i kám chai-iáⁿ, tó-ūi sī lí ê chhù
2017年發行於淺堤《湯與海》。
