我認為毋但佇台語社團寫，嘛愛去外口寫台文，予人看著，可能會引起𪜶 （in）的注意、興趣。
舊年年底，礁溪的面冊社團咧逐家同齊食飯的時，版主共我講，叫我寫一寡仔台語的教學文，我當做伊凊彩講講的，無插伊。第２天，伊咧版面寫聚餐的情形佮貼相片的時，閣寫一擺，指名愛我寫，按呢就是正經的，我開始寫台文的短文貼咧社團內底，猶閣有說明我認為較重要，意思差不多，拄開始寫的人較分袂清楚的字。
說明台字的文寫無幾篇，就貧惰，有的分享教學的影片，短文寫較濟篇，佇礁溪生活，拄著、看著的代誌。
搬來瑞芳，我直接貼台文，寫我坐公車去佗位行行一下，佇瑞芳市區創啥物代誌的短文，下跤的回應，我發覺有人會曉台文；有人講伊有用時間看；有人講佮阿媽講台語就好，毋免用寫的；閣有人講，叫阿媽查字典是無禮貌的代誌（？？。講台語是阿媽的專利？）……
想講咧礁溪社團貼的台字說明的文便便，就分享來瑞芳，頭一篇下跤，有人叫我「不要再寫了」，我問伊是按怎莫閣寫？伊無回應。昨暗，我查一下，竟然，講台字的，干焦賰第一篇，有３篇無去，可能予版主刣掉。
這馬文章咧網路貼出來，閣愛應付遐的各種意見的人，人有意見，咱有機會說明，是誠好的代誌，毋過文予人刣掉，當然會影響心情，遮仔攏是「情緒勞動」矣！嘛愛了誠濟氣力。公開貼文的人，心理素質愛真強才會使，較早時陣開始寫佮推廣台語台文的前輩我是誠佩服。
短文我會繼續寫，下一篇的頭前我來寫一下，表示我知影我的文予版主刣掉，嘛予逐家看覓。我無欲去問版主，無彼个氣力，嘛無欲佮人冤家。
（2025.11.3.）
（11/14）註：「表示我知影我的文予版主刣掉」的字我無寫，換一个做法，台字說明的貼文，我直接貼文字，莫用分享的，閣加「註：我拍算招一個「說台語，寫台文」的班，毋過愛沓沓仔等，這是課前服務，先來紡一下。」表示這是我開班的廣告，逐家攏咧貼店的廣告，我嘛來貼，哈！
