袂輸是府城的「平行宇宙」，對美術一館(原日本時代台南警察署)的路口看過去，看著鄭氏時代的孔子廟、日本時代練武道的武德殿、現代才起的美術館二館.......過去無仝時代的府城生活畫面，仝時綴來來去去的車，佇眼前放送。
原來「台灣文學」的概念遮晏才出現
原來咱遮有貢獻不止仔大的作家
原來有一位為台南犧牲遐大的律師
原來彼陣伊佇遐hông銃sat閣hông不人道對待
毋是見講就講過去，是因為過去的代誌，佇咱的學校教育真罕得講起，致使大漢了後，才共一頁一頁咱身軀邊真實的歷史，讀轉來。
【彼工發生佇遮：台南人權路．一段行過去的人間】
美術一館、台文館、湯德章紀念公園、故居
台南人權走讀(台語場) 石牧民 老師
逐不時我佇台南四界蹓蹓的時，攏足希望我會當有一款「超能力」！就是共目睭瞌瞌，閣擘金，就會使看著眼前的所在，佇一百冬前、兩百冬前、三百冬前的畫面是啥款，來來去去的人咧講啥物語言、穿啥物款衫、用啥物交通工具、做啥物代誌、in發生啥物代誌.......
