瑞芳的第一市場，是公家起的大樓，一樓是市場，樓頂有公共托兒所、運動器材、唱歌的卡拉OK……。市場干焦有幾若攤咧做生理，其他的攤位，冷凍櫃、設備、kha̋ng-páng攏有，就是無人，無開攤，真無彩。市場頭前過去彼條街仔，路邊的店面生理較好，人客真濟，較鬧熱。
我攏去第一市場買菜，若無的物仔，才去街仔買，in繼續守咧遮，應該愛予in支持，若有我欲買的物仔，逐攤攏輪流共買一下。
賣青菜的有３攤，我誠捷買的是倚佇較後壁中央的彼攤，後排的菜疊懸，看誠清楚，菜嘛誠濟項；有一攤佇行過一个門後壁彼區，上邊仔，我買過幾若擺，頭家誠好禮，有一擺送我一塊薑；另外一攤，菜排平平的，菜較少項，我嘛買過，較少擺。
我前２工想欲共較少項彼攤買。我徛佇攤前，量約仔三、四十歲的查某頭家問我：「你要什麼？」問二、三擺，我看伊雙手捾２个內底有菜的大塑膠橐仔，問伊：「你欲出去？」伊敢若聽無，我無插伊，繼續看菜，一目𥍉仔伊就倒轉來，閣問：「你要什麼？」我心內咧想，我嘛愛看你有賣啥？我想欲煮啥？嘛無別的人客，一直催我講我愛啥物菜？到底是啥物意思？
我無插伊，提一粒青菜花，囥佇我家己紮的橐仔底，共伊講：「菠薐仔半斤。」閣提２條茄，想講這２項較長，提一个較長的橐仔，佮青菜花同齊予伊。伊用手掠菠薐仔菜去秤，共橐仔囥佇邊仔，３項攏秤煞，共我講偌濟錢，問我：「要怎麼裝？」我指彼个長橐仔，講：「彼２項長的囥內底。」
實在有夠袂曉做生理，我一徛佇攤前，問我幾若擺：「你要什麼？」已經予伊橐仔，閣問我：「要怎麼裝？」別攤攏是直接共菜囥佇橐仔底，才提去秤，才袂散掖掖。後擺buaih共伊買矣！
（2026.04.17.）
○查字典
￭電腦：教育部臺灣台語常用詞辭典 https://sutian.moe.edu.tw/zh-hant/
￭手機：安裝「教育部台語輸入法」的APP，會使用講的。
