台語文學
「聖桮！」寶釵阿媽共桮抾起來，捏牢牢講：「多謝大士爺伯仔！原來欲揣挩窗愛向北⋯⋯我就知影，伊百面是去看孤坪！」
「聖桮！」挩窗嘛喝甲蓋大聲：「這是好吉兆啊，毋閣，大眾爺隨共桮抨倒轉來，敢有看批？」
挩窗手真賤，共黏佇桮身的金紙展開，掣一个大趒，喝講：「啊！死人骨頭！」跤就軟去，險險徛袂在。
開台尊王聊聊仔共金紙拈起來，眯一下，講：「此非人骨，乃是書法的字體，名『骷髏體』。」
「彼是啥物死人骨頭啊！䆀甲欲死！並鄭順聰的字閣較潦草！」哈囉剾洗。
「你閣講！等一下予你好看喔！筆佇我的手頭！」鄭順聰我袂爽啊。
「你寫啊！你寫啊！我是神你是人！毋驚！毋驚！鄭順聰你寫字若畫符仔！哈哈！畫符仔！畫符仔！」哈囉吐舌，激鬼面。
「無毋著，這就是畫符仔！」城隍爺按後殿行出來，見若有智識愛開破的，毋免問，城隍爺家己會講：「大眾爺其實有四十幾个，是一八九五彼冬，清國共台灣割予日本，咱台灣人毋甘願，建立台灣國，出兵佮日本軍隊捙拚，一直拚甲大林的三目溪（三疊溪）彼箍圍仔，咱台灣人死傷蓋慘。尾仔，有好心的人共四十幾个義士的骨頭抾做伙，埋踮打貓的北門，廟號名『福安祠』，尊稱『大眾爺』。你看，這張批是四十幾个大眾爺仝一个時陣同齊寫的，才會隨看隨回。」
「哇！這是秒回啊！會記得阿媽講過，廟邊仔捌徛一間電影院，民雄人真愛拆票去看影戲。阿媽經過攏會入去拜一下，講欲去民雄街仔，愛先來北門拜拜，會保庇物件買甲俗閣大碗。會當講，大眾爺毋是孤魂野鬼，是好神明啊！」挩窗講。
