新店的厝，我十幾若年前離開。幾若年後，因為有一寡仔原因（共囡仔講袂清楚，到這馬猶無講），我有時仔會轉來過一暝。幾年前，我的工作室佇共人的厝內摒掃，我有請in來摒幾若擺。
上尾一擺是２年前，第二查某囝欲結婚，我想親家可能會來，有摒過，了後就毋捌閣請人摒。
我摒我家己的房間佮我用的便所，其他的攏無管，灶跤的塗跤有時陣嘛會掃，食飯桌仔逐擺食煞攏有拭。彼个人的做法是，塗跤沒規塊的糞埽，就當做「清氣」，伊有提過掃帚無？有掃過無？我毋知。
幾若禮拜前，查某囝講彼个拜六，伊翁無佇厝，無代誌，欲𤆬囡仔轉來𨑨迌，彼當陣伊的老爸出國一個月無佇咧，我佮伊鬥𤆬轉來。
一開始，囡仔佇查某囝的房間耍，無偌久，就出來賴賴趖，行來行去，看到物仔就摸，提起來耍，我佮查某囝輪流綴咧，驚伊共物仔挵歹。
來到我的房間，peh起眠床頂，我看伊的跤底，有夠烏，緊咧提一塊桌布共伊的跤拭拭咧。以早查某囝𤆬囡仔轉來的時，我攏無綴，予伊老爸開車載。
我想著，厝內實在真垃圾（華語：髒），看袂順眼，囡仔下擺嘛會閣轉來，趁彼个人出國沒佇厝的時陣來摒摒。客廳已經無啥物物仔，揀揀，桌頂拭拭，用電吸仔共塗跤吸清氣，踏跤布攏總提去洗，淺拖仔嘛洗清氣，提去外口披予焦。
過一禮拜，鑢塗跤，踏跤布拿入來囥轉去原來的所在，淺拖囥門口，用line共囡仔講一聲。看著塗跤金爍爍，家己的心內真歡喜。
我佇這个厝內做厝內底的代誌，毋但無人呵咾、說多謝，連看嘛無看著，囡仔嘛按呢，凊彩啦！當做我愛做的。
（2023.10.27.）
（請指教）
