我的後生的囡仔９月底出世，蹛月內中心的時，拄著一擺風颱。轉去厝內，閣拄著一擺，我的後生佇氣象署上班，輪班，一工上班12點鐘，若是上日班，有風颱警報的時，日班的人愛加班，繼續上暗班，等於24點鐘後，才會使下班。伊24點鐘無佇厝，袂放心母仔囝，安排我，抑是伊的丈姆去陪in，做伴。
這２工有４个風颱佇太平洋頂懸，加班的班表已經排好，我閣愛去陪，我佮親姆攏離in兜無遠，閣做會到，是無要緊，無人鬥相共的家庭，愛家己較堅強一下。
這幾若工，我想著：
●以早，我的老爸是警察，風颱的時愛去救災，攏無咧厝內面，阮蹛日本宿舍，是木造的厝，阮老母規暝毋敢睏，捾家私頭的箱子，攑手電，遮釘一下，遐釘一下，我半暝醒來的時看著。
●我的後生這馬毋免去救災，毋過要上班、加班，佮我老爸佮款，袂當照顧家己的家庭。
伊上24點鐘了後，會使下班，做主管的人攏無轉去厝內，愛到警報解除了後，才下班。
●台電的工程人員
有一站仔時陣，我兜佇桃園稅厝，厝頭家的太太咧台電上班。以早，電火柱仔佇路面，風颱的時，風較大一吹，電線攏會吹歹，會停電，伊講風颱的時，工程人員若無上班，愛記過。
●猶閣有誠濟的行業愛上班、加班、待命，消防人員、醫護人員、交通……，誠濟公共服務的人袂使請假，閣愛特別加班，袂當照顧家己的家庭，予「一般的人」安心放風颱假，踮厝內面歇睏。
