日本文學 tuì 我來講較生疏，應當講規个日本文化 tuì 我來講攏生疏。
青春少女，逐个朋友攏 leh 痟日本歌星日本劇，我原仔 teh 讀西方文學佮收藏西方影戲。這久朋友 teh 痟中國戲齣、泰國戲齣、韓國戲齣，我 teh 揣臺文出版冊讀臺文閱本。自囡仔時到今佮意 ê 事項攏 bueh 相𫝛無啥變化，唯一 ê 變化日本文學開始 teh 讀，日文 mā 開始沓沓仔 teh 學。
呔討按呢生?我想這合該然交夏目漱石(なつめ そうせき) ê《吾輩は猫である》(I'm a cat)有關係。
按怎講？伊讀起來 buē 遐爾仔侘寂 ê 沈重。是，日本文學 tuì 我來講 m̄-nā 沈重閣愛 tī 雺煙散霧欣賞伊獨特 ê 殕色美感，這款若 Before the Rain ê 文學手路無敆我 ê 喙斗，雖罔我讀過 ê 日本文學比紋斑閣較需要復育。
第一擺聽人分張日本文學是二專 ê 藝術概論課，按法國轉來 ê 老師全學期講甲喙角全波，我 ê 神魂 mā 跟綴窗仔外 ê 雲成做雲波浪 ê 準做我愛閱讀，我猶是甘願綴風偷走厝。
這是我第一斗閱讀伐過一甲子 ê《銀河鐵道 ê 暗暝》，伊 hōo 我 ê 感觸無 tshan-tshiūnn 「世界文學台讀少年雙語系列」前兩本《你無聽--過 ê 格林童話》、《青瓦厝 ê 安妮》交金安出版社出版 ê《悲慘世界》有深甲若菲律賓海溝 ê 感觸，這凡勢交我慣勢掛大人 ê 目鏡看日本有相干， 不而過準做按呢生我 tuì 「丁小雨」交「小叮噹」是愛甲甘願 hōo 大腸告小腸 mā bueh kā 爸母交代 ê 食飯錢儉來 bué 大人講 buē 做飯食 ê 尪仔冊。這款態度敢算相踏黜？𠊎毋知 mā 隨在這个問題去，起因我已經揣著家己 ê 目鏡看日本。
《銀河鐵道 ê 暗暝》寫離別 ê 故事，伊 hōo 我想著歲月跟綴 1999.9.21. 1:47 永遠停歇 ê 二姊 tī「石邦尼感覺甘派禮定著去到遙遠ê河銀邊ah」彼日，伊徛踮媠媠 ê 花園 tuì 我微微仔笑，宛然是石邦尼交潘派禮做伙 tī 銀河旅行，紲落來「石邦尼目睭peh金，原來是siunn thiam倒tī山崙ê草á埔睏去ah。心肝頭燒燒、真ak-tsak，冰冷ê目屎四淋垂。」我知影彼是二姊 tuì 我講莫 uī 伊傷心 mā 莫責備家己 ê 告別。
地震前兩禮拜，出門上班 m̄ 知啥物因端我按 óo-tóo-bái 跋一个蹛院三工，芋仔爸番薯母二姊交吩咐我轉去厝好好調理斷骨，我因為愛情堅心 m̄ 轉去厝做大小姐 hōo 厝內人照顧交二姊冤甲天逢掀起來，紲落來互相賭氣 m̄ 講話。這个掠做棺材 buē 貯少年人 ê 賭氣成做我一世人 ê 遺憾，不而過每當我感覺遺憾，二姊徛 tī 花園無出聲文文仔笑 ê 畫面隨泅入心肝穎 hōo 我 ê 喙角 mā 跟綴微微仔笑，然後寶惜人生 ê 緣份交上蒼 ê 疼痛。
2023.05.30
