前一站仔貧惰鬼講「遮 ê 食譜都記錄踮愛料理(Icook)，呔討愛加一遍工？」心頭掠無定阿里不達清彩一弄，果真 hōo 鬼攝去。
今仔日手那沖玫瑰萵仔菜，平鼎仔 ê 魚指 mā 那瞭，一个聲音問我「愛料理 ê 網頁設計敢有分類 ê 功能？」台灣 ê 秋分水道水多數猶原燒烙，德國秋分 ê 水道水已經冰甲若囡仔時 ê 拆箬，每漉一喙水阿媽講 ê 囡仔人尻川三斗火就纏綴爍爍顫 hōo 我憢疑較早睏 ê 阿媽 uī-tio̍h buaih hōo 我半路吵精神就喙抺蜂蜜講我是伊上愛 ê 火熥。平鼎仔 ê 魚指跟綴電磁爐慢分 ê 熱情勻勻仔嘁喳叫，沖甲無半粒田塗 ê 玫瑰萵仔菜摵 hōo 焦，彼支無輸德國雙生仔 ê 捷克菜刀按屜仔提出來一刀一刀切做絲，無局 ê 思路 mā 順手頭 ê 菜絲愈來愈清楚。蒜頭大力拍 hōo 碎鹽鹽，立夏猶未行跤到德國南爿已經骨力清水槽、花矸、水溝仔 ê 畫面成做冬至 ê 圓仔一粒一粒浮在眼前，德國南爿交亞洲虎蠓(Asiatische Tigermücke)捙勢遐 tsuē 冬，亞洲虎蠓猶原 m̄ 捌成做天然珠走甲無看影。
德國南爿 uī-tio̍h 掠蠓需要遮清遐摒交四界澍藥，我這連蠓都無興來唱歌 ê 部落格，有人願意斬我 ê 稻仔尾換一个角度來看這是好 ê 鬥相共，畢竟對方猶原尊重我 ê 手路，無 kā 羅馬字翻譯做𪜶認為 ê 意思。夯硬篙一敨放，美國時間隨換德國時間放龜鱉蟳䘂自在生活，注心家己 ê 需求。
德國南爿 uī-tio̍h 掠蠓需要遮清遐摒交四界澍藥，我這連蠓都無興來唱歌 ê 部落格，有人願意斬我 ê 稻仔尾換一个角度來看這是好 ê 鬥相共，畢竟對方猶原尊重我 ê 手路，無 kā 羅馬字翻譯做𪜶認為 ê 意思。夯硬篙一敨放，美國時間隨換德國時間放龜鱉蟳䘂自在生活，注心家己 ê 需求交 Zarathustra 相放伴搜揣我 ê Übermenschen。像讀無《殺鬼》m̄ 是我 ê 智識無夠額，是我慣勢 ê Le Fabuleux Destin d'Amélie Poulain 交作者無相𫝛，所致僫行入伊 ê 故事。心 ê 羅經揣著東南西北，孔子公講 ê 敬鬼神而遠之，步頻成做阻礙我成做超人 ê 駝鳥心理。
出發歐洲火藥庫 Balkan 進前受〈麵線婆的電影院〉➀引𤆬我接續上網倩博客來 kā 我鬥寄這位 tī 臺灣文學界非常有份量，不過 tuì m̄ 捌一字一劃 ê 我伊是生份作者 ê《殺鬼》繼續綿精跟綴出版社 ê Slogan「每個人心中都有一座島嶼，藉文字呼息而靜謐，Island，我們心靈的岸」。
出發歐洲火藥庫 Balkan 進前受〈麵線婆的電影院〉➀引𤆬我接續上網倩博客來 kā 我鬥寄這位 tī 臺灣文學界非常有份量，不過 tuì m̄ 捌一字一劃 ê 我伊是生份作者 ê《殺鬼》繼續綿精跟綴出版社 ê Slogan「每個人心中都有一座島嶼，藉文字呼息而靜謐，Island，我們心靈的岸」，然後成做正範 m̄ 捌字看告示隱痀捙畚斗閣 ê 食力兼歹看...
讀《殺鬼》我嚴重憢疑家己敢捌這个語文，不而過幾米 ê換「一个角度看世界」交小王子 ê hōo 錦蛇食入腹肚 ê 大象是大人 ê「一頂帽仔有啥物好驚？」，這个掠做家己冊讀甲尻脊骿 ê 著觸隨化做輕兩想 ê 無影跡。
出門露營車日子有冊通做伴是幸福，當幸福成做壓力就愛放伊交家己自由飛。出門 Balkan 除了倩博客來 kā 我延續麵線婆 ê 緣份，我 mā 請台灣e店 kā 我鬥相共寄陳雷（吳景裕醫師）ê《阿春無罪》交《歸仁阿媽》等等僫 tī 博客來見著 ê 作品。
是吳醫師 ê 文字行入我 ê 世界抑是彼是天賦自然 ê 理解？我這个世代 ê 囡仔 m̄ 捌學習台灣歷史，不而過迵過吳醫師 ê 文字，我有才調 kā《鄉史補記》ê 歲月完整鏨 tī 頭殼，《殺鬼》讀完唯一 ê 記持是彼是一段交阿公 bueh 相仝 ê 年間，交想甲頭疼猶是捎無摠 ê 火車畫面。
順 An der schönen blauen Donau ê 匈牙利車日子到 România（羅馬尼亞） Eselnita 倚奇麗藍色 Donau ê 露營區搪著一位 kan-na ē 曉講羅馬尼亞語 ê 序大，伊 uī-tio̍h bueh hōo gún 翁理解伊綿豉請教 ê 問題「你敢知影露營地 ê 主人 tī 佗落」，伊喙那講手那勻勻仔擛來表示「主人等一下就出現」。，伊勻勻仔 iōng 家己上自在 ê 語言兼比跤劃手 hōo gún 看。Gún 翁猶原若〈凱西講 gû〉熥「Do you know where the owner is?」
「你繼續熥 Do you know where the owner is mā buē 有答案」東南西北四界巡一逝，確定 tī 這个無半間𥴊仔店徛起 ê 角勢，耐性就是時間，時間就是答案「主人等一下就出現」我微微仔笑 tuì 序大講，序大順我 ê 微微仔笑 tìm 一下仔頭表示「著」，gún 隨人享受家己 ê 美國時間放「凱西」阿母繼續「凱西，媽媽帶你去婆婆家....」。
順奇麗有水蛇自在泅來泅去 ê Donau 巡 hōo 籬仔圍起來 ê 露營區，《歸仁阿媽》〈阿bái〉ê 這段話 mā 跟綴來來去去 ê 船不斷上岸落岸 ê 潮水輕輕划過我 ê 眼前：
「美--a，啥物叫做 suí？」𪜶某心內龜怪，thài 會一个人好好 pua̍h 一倒，無頭無尾問這款問題，應講：「Suah m̄ 知，看了會歡喜--ê tō 是 suí」koh 問：「啥物叫做 bái？」 「A̍h 若看了無歡喜--ê tō 是 bái。」「莫怪我 m̄ 知，我無目睭看。」發--a 吐一个 khuì。𪜶某 lú khah 奇怪，問：「發--a，你外面啥物代誌？」發--a tiām-tiām，kā 𪜶某 giú uá--來，suah 伸手摸伊。十枝指頭 á 先摸伊 ê 身軀，koh 摸伊 ê 手，才摸伊 ê 面。一位一位細細膩，像 teh 掠龍按呢摸，一晡摸透透，才講一聲：「Suí。」 𪜶某想講伊 teh 滾笑伊，罵：「你無看--見，m̄-thang 烏白講！」發--a 又 koh 摸伊 ê 面，講：「我目睭無看見，這十枝指頭 á 有看--見。𪜶目睭看會著--ê，我攏摸會出--來。」
「𪜶 ê m̄ 捌字 m̄ 是我 ê 問題」猶 tī 面冊沐沐泅回應 hōo 六月芥菜假有心 ê 點揬 mā 順上岸落岸 ê 潮水波浪輕輕捊過廕掉 ê 磺火記持。一路按德國出發到遮，無一个人要意我手頭 ê 文字，呔討我讀甲遮爾仔新婦仔性地？Warum？
「Hallo, hier」分 buē 清是英語 ê Hello, Here 抑是德語 ê Hallo, hier，我順挨拶看過，一位先生 kā 門拍開表示我會使得入營地，我順營地街路行到大門口，發見序大 ê 露營車交 gún-ê 露營車齊入營地，gún 翁自在閣快樂交一位生份人先生破豆，我行過序大遐交𪜶拍一下个招呼 kā 人成做行動日頭花享受交台灣相比並是僫得 ê 日鬚寬寬仔伐轉來家己 ê 營地。
「Hola, Cómo estás」生份人先生笑微微講，「Gracias, estoy bien」我 mā 文文仔笑應我少少 ê 西班牙語。
「這是主人家，伊 buē 曉講英語 m̄-koh 西班牙語無問題」捌 tī 西班牙讀書 mā kā 西班牙當做家鄉 ê gún 翁笑咍咍講，我 tìm 一下仔頭表示露營地 ê 鋩鋩角角 hōo 你處理。
下昏飯結束那窮碗箸那看其他晏到 ê 德國人明明知影主人家 m̄ 捌英語猶是硬 bueh 講半桶仔師 ê 英語交英語無問題猶是自在使用法語交主人家破豆 ê 比利時朋友，我想著人 tī 葡萄牙露營區法國序大邀請我交葡萄牙序大做伙練仙 ê 畫面，語言 m̄ 是重點，態度 tsiah 是要訣。碗箸洗清氣，順人造燈伴滿天星斗讀歇睏三冬《復活的人》「歹運就假若蜘蛛仝款會佇無意中出現佇花欉，看著，共掠走就好矣。」，「莫名其妙 ê 自卑就假若無守規矩 ê 厝邊三不五時 kā 塑膠袋仔擲入有機潘桶，看著，kā 撓起來就好矣，免龜龜鱉鱉、掩掩揜揜逼家己成做家己無熟似 ê 人。
Eselnita ê 星敢若柴樠點火遐爾仔光，以 Thoo-lá-khuh 做露營車 ê 序大伊自在 ê 回應 hōo 我想著華語講甲無輾轉交台語十句有九句是變調 ê 芋仔爸，𪜶從來 m̄ 捌 uī-tio̍h 語言感覺懸低，𪜶 mā m̄ 捌 uī-tio̍h 別人有才調講我 ê 話開始講家己看 buē 上目 ê 話，像翁兜 ê 勥母。每一个人有家己 ê 聲調，有家己 ê 符號，遮 ê 符號無態度無自信押尾猶是《後天美女製造機》ê《靈魂裏的胖女孩》，像凱西 ê 阿母。
➀《喪禮上的故事》甘耀明
2023.09.28
