愛爾蘭 日前公佈派出 Gar O'Rourke 嘅首部紀錄長片「Sanatorium」出戰第98屆(2026)奧斯卡最佳國際電影。
電影嘅舞台係位於烏克蘭港口城市敖德薩(Odesa)市郊嘅庫亞利尼克(Kuialnyk)療養院，當地本為河道出口嘅鹹淡水交界處，但因淤泥堆積而成為鹹水湖，日積月累下湖水鹽度相當高，而淤泥就含有豐富礦物質，研究證實有消炎止痛，恢復活力嘅功效。1833年當地醫師Erast Andrievsky 開始喺湖邊設立鹽水浴同泥漿治療設施，廣受歡迎，甚至有火車同電車等交通設施。每個夏天，過千旅客到訪充滿蘇共風情嘅Kuialnyk療養院享用各式設施，專治關節、筋骨、神經痛症，對男女科診治亦有療效；同時療養院亦係國家級歷史建築。
Gar O'Rourke (下圖) 係一位經驗豐富嘅廣告同紀錄片導演，合作客戶有 Canon、Sony、Dyson、Visa、Patagonia、CBS、法國電視台、BBC、Paramount+同Netflix等。2018年，佢到基輔拍攝關於全球最大型戶外健身樂園「Kachalka」嘅紀錄短片，自始愛上烏克蘭。逆晴期間，佢從烏克蘭朋友口中得知呢啲蘇式老派療養院，佢就好想去一次，靜靜地充個電，於是2021年一開關就即刻去咗Kuialnyk做Treatment，好快佢就俾呢個地方嘅氛圍同埋人--不論係賓客定係職員--吸引住，並有以此為題嘅拍片念頭。
好景不常，2022年俄羅斯侵略烏克蘭，作為海軍重地嘅敖德薩自開戰起就遭到俄軍狂轟猛炸。面對逆晴同戰火，Kuialnyk療養院嘅客人無奈大幅減少，甚至停業一年，不過重開後員工依然堅守崗位，繼續為寥寥無幾嘅病人提供治療同娛樂。2023年，Gar O'Rourke 終於有機會重訪Kuialnyk做進一步嘅考察，發覺比起治療身體，當下療養院嘅人更希望從戰爭中得到短暫嘅喘息，重整自己再出發，所以大家都好盡力去放鬆。導演於是由呢個觀察開始奠定拍攝嘅基調。
電影喺2024年夏天資金到位後正式開拍。作為「日常系」紀錄片，搵出好嘅人物去跟拍非常重要--療養院職員比較易接觸，但要搵有趣又願意分享自己嘅客人就難。導演同當地嘅製作公司「2332 Films」合作，通過佢地嘅選角指導，成功搵到合適嘅客人去跟進。而為咗保持上述嘅輕鬆幽默感，導演用咗大量嘅對稱定鏡構圖，配合療養院蘇聯粗獷簡潔嘅建築去營造氣氛；配樂具喜感之餘亦盡量貼合1970年代嘅風格。
不過開拍後Gar O'Rourke依然遇上危機--開拍約10日後，有金主因為擔心安全同保險問題打算撤資，於是官方部門Screen Ireland要求導演選擇等戰爭結束後先繼續拍，或者即時離開烏克蘭，「隔山打牛」完成攝製。好在導演有過同烏克蘭人合作嘅經驗，加上全個劇組只有佢一個愛爾蘭人，於是佢選擇「遙控」「2332」嘅7至8位兄弟，繼續用35日嘅時間完成拍攝，然後再喺愛爾蘭完成後期剪接。
「Sanatorium」今年3月喺哥本哈根國際紀錄片展(CPH:DOX)同瑞士真實影像(Visions du Réel)電影節首映，唔少回應都指係芸芸俄烏戰爭紀錄片中，屬於有趣嘅少數；電影亦已經安排到敖德薩放映。Gar O'Rourke 現正籌備佢第二部紀錄長片「The Siege Of Paradise」，以意大利北海岸為舞台，明年4月開始拍攝。
愛爾蘭至今派出過11部電影參賽。雖然愛爾蘭影視明星如雲，但由於愛爾蘭語本身喺愛爾蘭並唔流行，所以佢地不時會好似今年咁，以第三地為題材嘅作品出賽，2017年(90屆)嘅「(台)加薩戰火：無解的以阿悲劇 Gaza」同2023年(96屆)嘅「In the Shadow of Beirut」都係以中東地區為題材嘅紀錄片；另外Paddy Breathnach執導，故事發生喺古巴嘅「(台)變裝皇后萬萬歲 Viva (2015，88屆)」就入選過Shortlist一次。
但當愛爾蘭有機會以愛爾蘭語電影出賽果陣，成績就相當優異，上屆以同名Hip-Hop組合為題材，成員親自上陣飾演自己嘅話題作「(港)嘻哈！膝頭哥天團 / (台) 嘻蓋骨男孩 Kneecap」入選Shortlist；而前年(94屆)「(港)恬靜之夏 / (台)夏日悄悄話 A Quiet Girl」更首度令愛爾蘭打入最後5強。今年愛爾蘭代表遴選委員會由8人組成，「Kneecap」導演 Rich Peppiatt亦在其中。
「Sanatorium」似係各紀錄片展都會有興趣嘅作品，睇下有冇機會喺香港睇到了。另一方面，今年愛爾蘭都唔係冇愛爾蘭語電影嘅，香港同志影展就選映咗靈異片「血源 Fréwaka (Aislinn Clarke 導演) 」，無獨有偶都同烏克蘭有啲關係。仲有飛賣，有興趣可以到以下網頁﹕https://cinema.com.hk/en/movie/details/17450
