你敢捌聽過「契囝過限」？你敢捌參加過？
【契囝 khè-kiánn】
真濟人可能有這个經驗，細漢時爸母向望囡仔好育飼，會去廟裡求神拜契，予神明做「契囝 khè-kiánn」，予囡仔加一份愛佮福氣，保庇囡仔平安大漢。所以你身軀邊有人可能是關帝爺的契囝、王爺公的契囝……
【過限 kuè-hān】
真濟地區有保留這款風俗，廟裡主神神明生的時，除了祝壽、犒軍，閣有佇各地的契囝攏會轉來「過限 kuè-hān」。
「過限 kuè-hān」是一款儀式，咱逐个人的人生當中難免有一寡「關限」，透過紅頭法師做法造橋，佮彼年的契囝頭做伙𤆬領眾契囝，行過「七星平安橋」，代表共歹運佮無好的物件攏留佇橋的這爿，消災解厄，象徵度過人生的難關！
【割鬮 kuah-khau】
咧行七星平安橋的時，手裡會提香閣有象徵代罪受過的「草人替身」，草人替身頂懸會結「鬮錢 khau-tsînn」，古早是用銅錢，現代是用十箍銀角仔，一个是象徵買通路關的「買路錢」，一个是象徵解厄行運的「解運錢」。逐家行七星平安橋，行三輾，上尾，法師會做「割鬮」，象徵斬斷衰運，閣佇衫仔頓廟印，行向無阻無礙的未來！
佇這工嘛是庄頭內村民聯絡感情的時陣，全村總動員攏出來鬥相共，隨人無閒鬥款東款西，廟埕的歌仔戲佮布袋戲 khin-khin-khiang-khiang，佇各地的契囝嘛會陸陸續續倒轉來，人，佮人、佮土地的互動攏佇空氣中流動……
宗教科儀、信仰文化咱愛看重的，毋是有影抑無影、毋是有靈聖無，重要的是遮的科儀佮互動，攏是一款「儀式感」，了解其中的意涵，透過儀式，共家己「心內暗示」，相信無好的攏會過去，有神明共咱鬥相伨，有勇氣拚過難關！
若見擺講著宮廟，干焦用「8+9」這款標仔來準過，按呢實在足可惜的！
