５月初，基隆有一場活動我想欲參加，今仔日有閒，先去看覓一下，知影地點佇佗位，毋通到時揣路無順利，時間袂赴。
我瑞芳蹛的邊仔有一幫客運到基隆，想欲共坐看覓。早起代誌做好，查到站的時間，早10分鐘去等車。車來，𬦰起去。原來瑞芳高工過去無偌久，就是基隆市。一路彎彎斡斡，路細條，邊仔的厝起甲誠密，司機開甲誠雄，我看老人，欲落車的時，就愛細膩，手若無扞予好，骨頭可能會散去。一半條路較大條，路邊厝少，沒偌久，厝閣密起來，看起來，佇基隆市內，駛誠濟分鐘。到終點，號做：「基隆城際轉運站」。
轉運站內底真新誠開闊，我自頭前行到後尾。出來，行港邊，整理甲闊闊閣清氣，連海水嘛清氣，佮進前誠無仝款（幾若十年前矣！）。基隆是阮翁自細漢蹛的所在，in老爸少年的時來基隆食頭路，一直蹛佇基隆，阮翁的大兄咧基隆做生理，落尾佇台北買厝，囡仔蹛台北，in翁仔某蹛基隆，２邊蹛真濟年，才規个攏蹛台北。進前我佮阮翁來基隆，我根本毋捌路，攏綴伊行，人濟路狹厝𤲍（kheh—擠），落雨的時心情有夠齷齪（ ak-tsak—煩躁），誠濟年無來，變甲遐濟，尤其轉運站起好，坐車、等車誠利便，火車頭嘛是新的，毋知影是當時起的？
先去揣辦活動的所在，真緊就揣著，佇４樓，看２樓有咖啡館，樓梯口寫若是燈箱有光，就是有開，燈箱無開，我猶是𬦰起去看覓，有影無開。落來，揣食飯的所在。想著「彩虹屋」，查手機仔，自遮行路去愛一點鐘，毋免。行海邊對面彼條亭仔跤，行一逝，揀一間咖啡館，入去，點餐，提一个電子號碼牌仔去樓頂揣位坐。
樓梯起去，是樓頂後壁的一細區，幾若塊桌仔，有幾若个查埔人講話大聲，行來行去，有夠吵。我行去頭前，看著外口海港的桌仔有位，我坐落來，好佳哉，離遐的人誠遠，無聽到in的攪吵聲。我先去便所。便所佇彼陣人桌仔的隔壁，我佇便所內想著以早，我聽過查埔人講，in按呢講做「豪爽」，在我看來是「粗魯」。
我食了，看壁頂佮桌頂攏有寫餐具愛家己收去一个所在，我欲走的時，共茶甌、盤仔捧去架仔頂囥好，看遐的查埔人的桌頂亂操操，in無收。有影，毋捌字兼無禮貌、無衛生。
轉來到港邊（海洋廣場），看到海水的正手爿（基隆港東岸碼頭）有一隻郵輪，有幾若層懸，行去看覓。行到大樓前就行袂過去，我攑頭看，寫：「港務大樓」，我想講是公家的辦公室。有人入去大樓，門開的所在我看有一座菜單徛佇遐，我入去，有一間咖啡館，對面有店賣物仔，抑有一个櫃台，敢若是旅行社的，我想欲去問有船通坐無？當場買票，去坐船，出去𨑨迌嘛會使，這个想法咧頭殼入底想想一下。入去咖啡館坐，啉咖啡，看外口的菜單，有「蘋果起司鬆餅」，想欲食，就點這２項。
玻璃壁頭前長條的單人座無人坐，我坐落去，看港水平平，海鳥佇頂懸飛來飛去，對岸遠遠有車駛來駛去，誠好命。對面的船寫「海巡署」，船誠大隻，想到in，就感覺in的工課足辛苦，閣危險。
我提紙出來寫自由寫作。毋知過偌久，邊仔的位攏坐人，我好來走矣！出來，看這棟大樓誠長，我行看覓。起去２樓，有餐廳，真正有旅客等船佮歇睏的所在，每一間共伊看看一下，風景誠好，通路的邊仔有種樹仔佮花草。膓肚閣枵矣！中畫頓的紅酒燉牛肉，牛肉干焦細細的４塊，配卵包飯；咖啡館的鬆餅食四分之一，賰的紮轉來，共生菜佮蘋果、起司食完，按呢肉食無夠，愛閣食。揣一間，點牛肉丸，攏總有６粒，食３粒，賰的３粒紮轉來。我的揹仔內不時有紮盒仔、塑膠橐仔，共袂使食傷濟的飯、麭……紮轉來，另工才食。
算算一下，中畫頓食３擺，才無閣枵。
閣起去３樓，是「ＸＸ花園」，長長的路，看海，另外一爿是馬路，會使倚郵輪誠近，船頭抑是船尾有穿制服的人咧做工課，看著in的窗仔門，有外國人佇窗仔外口坐，頂懸吊幾若个大kha物仔，我臆是救生艇？
本來咧查客運車的時間，算時間行轉去轉運站，想到客運車駛遐雄，挵來挵去，抑是坐火車較好坐，火車毋免看時間表，去車頭看就好。
轉來到厝４點外，心情有淡薄仔怪怪，無好？抑是啥物？講袂清楚，可能想著過去，較少年的時，佮先生，抑有in兜的人鬥陣的代誌。算起來，阮大冤家是30年前，我20年前退休，想欲過我想欲過的日子，嘛袂使，２个無仝國、無仝時代的人，冤無路來。分居17年，過我家己的日子，毋免閣替伊佮in兜做代誌、了我的氣力，干焦做我家己的，是我上歡喜的。
（2026.04.20.）
是這个活動，予我先去看辦的所在。
https://www.facebook.com/share/p/1CGgf8Dy6A/
○查字典
￭電腦：教育部臺灣台語常用詞辭典 https://sutian.moe.edu.tw/zh-hant/
￭手機：安裝「教育部台語輸入法」的APP，會使用講的。
