（7/21改幾若字毋著的字）
朋友佇面冊寫，這馬的人，暗時仔無閒到半暝，倒落去眠床，睏袂去，食愛睏藥仔，叫身體睏去。
早起起床，猶未清醒，啉咖啡，抑是提神的物仔，叫身體精神。實在是誠奇怪。
是啊！有的人，暗頓食了，繼續做工課、敲電話；有的人佇網路頂戀看文章、資料，抑是拍電動、看劇。舞到半暝才去睏，睏袂去，食愛睏藥仔、助眠劑，才睏去。
早起起來，可能藥效猶未過，主要是睏的時間無夠，歇睏無夠，當然無精神，因為愛上班，就啉咖啡、食提神的物仔，想講按呢做，身體就有精神矣！就會使開始一工的工課。
遮的人想講身體是無限度咧為咱做代誌，儘量用，無站節，等到無爽快的時陣，誠去看醫生。
阮兜定期有老師來拍打，拍打的時足疼，逐家攏疼甲哼哼叫，老師定定講：「你們以前糟蹋身體，現在就要還。」以前挵著、跋倒、受傷，抑是傷忝，無好好仔治療、保養，舊傷坐入去身體內底，就歹處理矣！伊講遐的食藥仔、復健、開刀、掠龍的方法攏無效。
遐的無好好仔照顧家己身體的人，後擺攏愛還的。
我進前咧寫小說的時，猶咧上班。下班了後，轉到厝，煮飯，食飽洗碗筷、洗衫，佮囡仔講話，攏做煞，差不多八、九點的時，開始坐落來寫，寫到12點，去睏。
倒落佇眠床，頭腦猶咧踅，睏袂去，我毋知影按呢做袂使，繼續寫，因為我的頭殼內底有真濟故事，坐落來電腦頭前，手指頭仔就一直寫出來。無偌久，毋但睏袂去，憂鬱症閣發作，閣愛去看醫生、食藥仔，我才知影，睏前袂使激頭腦，寫物仔，嘛袂使做遐的聲光刺激的代誌，才會順利睏去。
（2024.7.20.）
