推開「188隨意門」，原意是「隨意」，但往往世事，就係教人驚喜！ 你的隨意門通去邊度呢？
或者，好多人都一樣——都想打開見：幸福！乜嘢係幸福？大家一定畀到好多答案我。但，有冇朋友可以真真正正企出嚟，話自己「而家好幸福」？連我都唔敢。乜嘢係「而家」？咁過去呢？未來呢？但……「小確幸」，我就有好多。幸福從來唔係結局，只係一場經歷。我哋往往將佢定義得太簡單——以為去到彼岸，幸福便會出現。好耐之前，我識得一個朋友嘅細妹。廿歲出頭，為咗追尋佢嘅「幸福」，同屋企炒大鑊。目的，只係想搬出去，同男朋友同居，建立佢自己的「家」。呢個畫面，好似我哋嘅一生縮影：讀書、工作、結婚、生仔、搵錢——最後都係為咗一個字：「家」。因為呢個字，彷彿就代表著幸福。佢為咗呢個畫面，押上咗同屋企人嘅關係，押上「不孝女」嘅罪名。 呢個，就係佢對幸福落嘅賭注——不歸路嗎？
但亦有啲人，從來冇咁樣嘅經歷。唔好話幸福，可能連「幸運」兩個字，都未曾降臨喺佢身上。一世平平無奇，困喺同一個家——呢個，又叫幸福嗎？
提起「家」，我諗起一部日本電影——《幸福的黃手絹》。
一個男人出獄，連返屋企嘅勇氣都冇。佢同太太約定：如果仲等緊佢、仲歡迎佢返去，就喺門前掛條黃色手巾。佢坐車，一路忐忑，一路恐懼。唔敢望。到最後，朋友叫佢開眼——漫天飛舞、掛滿成枝竹竿嘅黃色手絹。嗰種死寂後嘅爆發、絕望盡頭嘅狂喜，係一種「大幸福」。
少女嘅「離家」與男人嘅「歸家」，都係幸福嘅豪賭。前者用決裂換未來，後者以等待贖回過去。佢哋都係「大幸福」嘅追尋者。將人生押喺一個點上 —— 唔係天堂，就係地獄。
而我哋，大多活喺兩者之間。生活中，更多係由「小確幸」拼砌。 凌晨三點寫完滿意嘅文字； 一杯啱啱好溫度嘅齋啡； 跑完十公里之後筋疲力竭的快感； 或者喺舊書堆搵到絕版CD。 甚至，只係戴上耳機，世界得返你同音樂嗰一刻。 又或者——冇靈感嘅夜，YouTube向我推薦咗 孫燕姿的〈遇見〉。 呢啲「小確幸」微小但確實。唔會改變人生軌跡，卻係繼續行落去嘅燃料與支撐。
「大幸福」是一場風暴；「小確幸」係風暴之間嘅晴空。晴空不可追，只能「遇見」。 冇「小確幸」做底，追「大幸福」會苦不堪言。 冇「大幸福」做燈塔，「小確幸」又變得瑣碎。 或許—— 幸福唔係一個答案，而係懂得喺追尋「大幸福」嘅途中，俯身拾起一粒又一粒「小確幸」嘅能力。
細個嗰陣，中午飯後電台傳來溫柔聲音： 「幸福好似玻璃球，打碎咗，每個人喺地上執碎片。有人執多啲、有人少啲，但冇人可以攞齊全部。」 大的，我都有執過；小的，我也「遇見」過。 再聽〈遇見〉，像一條塵封鎖匙，打開我記憶嘅門。我想起，曾拍過一對情侶MV嘅「春夏秋冬」。只拍得「春」與「夏」，停咗。聽說後來佢哋結婚，男方飛去沖繩「扮遇見」表白。
原來幸福真係要追——要追到別國。而我，嗰個未完成嘅「秋冬」，成咗心中關於「小確幸」嘅註腳。至少，我仲有「春夏」。
今朝，我隨意打開隨意門。讓我遇見乜，就乜吧。想追尋「大幸福」，不如先畀我啲幸運。隨意著衫穿鞋，竟拎起一對黑色 New Balance。穿上之後先恍然覺醒——NB：New Balance，新平衡。呢個巧合溫柔提醒我：係時候，為自己人生，搵返一個新嘅平衡點。穿上「新平衡」，重新出發。 左腳踏住大幸福， 右腳踩著小確幸。推開隨意門，回「家」去也。
【編輯室絮語：一趟旅程的兩個入口】
這篇文章，是來自「188頻道」的幸福思索，也是另一篇文章的「孖生兄弟」。
它的下一篇，是來自「千禧散步麥田日誌」的 黃篇：《當黃椒遇見青椒及紅椒組合成三色椒的時候，我在黃金海岸「遇見」幸福黃手絹》。一篇關於「回歸」，一篇關於「奔赴」，兩篇文章互相呼應，構成了一場完整的幸福思索。
如果你是由《黃椒》篇來到這裡，恭喜你走完了全程。如果這是你的第一站，不妨點擊前往旅程的另一個入口，看看幸福的另一種模樣。
