《伊終於明白我無放棄彼个想法》
2016年春天，因為我通知伊一場的活動消息，看伊有想欲參加無？加了解一寡仔這種無仝款的親密關係的方式，她到這馬才知影我無放棄開放式關係的想法，冤家閣再開始。我一直說明、解釋，伊用一對一關係仝傳統的講法、邏輯反駁、攻擊、毋承認……，嘛一直講欲分手，因為伊袂當接受，她痛苦……，我請伊去問別人，聽別人的分享，袂找我問，當然無路用，伊干焦問我。我嘛咧想阮這是啥款的關係？我２禮拜一擺去南部是咧創啥物？干焦是換所在散步佮歇睏爾爾？
歇熱的時，伊講伊答應矣！接受我想欲愛的關放式關係，其實無真正接受，因為伊的講話佮做的代誌，伊真正的意思會趖出來，毋過伊毋承認伊無接受，講我無相信伊已經接受矣！
2017年頭，舊曆過年前，我提議分手，我感覺過去的半年（2016年的下半年），阮對這个關係啥物代誌攏無做，沒貢獻，關係已經歹去矣！內底沒物件，我決定７月稅厝簽的約到期的時，buaih（無愛）閣紲落去稅，這幾若个月當做分手期，閣再講講一下。伊講分手就分手，按怎閣愛講？喔！我這馬才知影，伊認為分手就毋免講；若欲講，是有可能袂分手的。
我的想法是，分手進前一定愛談，共一寡仔代誌講清楚，毋管以後會閣聯絡無，總是愛共話講煞、講清楚，毋通共不滿、毋甘願、用臆的去過紲落來的日子。咱嘛會使改變關係，變做床伴，干焦鬥陣做伙睏，平時免聯絡；抑是見面干焦講話爾爾，毋免起去眠床。
過幾若工，伊講伊無愛分手，顛倒對我較好，嘛無閣冤家矣！關係小可仔較好一屑仔。我明白，嘛親身實行佮進前無仝款的方式，毋管她講啥物，我猶是做我想欲做的，我感覺這馬的心情好就是心情好，歡喜就做歡喜的代誌，袂因為伊的反應，嘛袂因為伊講啥物話，來改變我想欲做的代誌。意思是，進前我定定予伊影響，紲伊歡喜，抑是無歡喜。
《伊的情緒大爆發》
彼當陣仔開始講甲比進前有較深入，較倚重點一屑屑仔。毋過較好的關係維時無偌久，2017年歇熱的時，是伊的情緒爆發上激烈的時陣。我拄著我佮意的Ｄ。我佮D無啥熟似，毋捌佮伊講過話，捌佮伊同齊拍乒乓，伊較會曉，佇隔壁桌，閣有一擺，一寡仔人同齊去𨑨迌，烘肉，按呢爾爾，我知影伊，伊毋知影我。聽朋友講伊會曉做啥物代誌，我邀請伊來我的工作室做。
幾若擺了後，我感覺我佮意D，想講閣過一站仔，合作若順利，講會來，我拍算共伊講：「我佮意你。」閣加註解：「我佮意你是我的代誌，你有佮意我無？是你的代誌。」伊若嘛佮意我，可能有啥物行動；嘛可能啥物代誌攏無……
前女友伊臆著，問我幾若擺，我躊躇，落尾承認，她加Ｄ的line（in２个佇我遮熟似，嘛是我無細膩，共Ｄ的line予伊）。伊佮Ｄ講真濟話，等於探聽D的情形，越過頭來苦勸我，講Ｄ佮伊的女朋友是堅定的一對一關係，佮女朋友的關係變好，叫我莫介入……，我準備欲共D講的話，嘛有講予伊聽，伊根本無咧聽，頭殼內底搬伊家己編的戲齣。
Ｄ無想欲介入阮的代誌，離開，我有淡薄仔無歡喜，除了原本拍算的活動雄雄停止以外， 我嘛失去一擺的機會。猶有，我解說、說明幾若擺，伊攏無咧聽，我感覺誠失志，上尾仔對伊講：「你共Ｄ趕走，你就歡喜矣？」伊講是，我講：「猶有下一个，下一个會閣較好。」伊閣開始煩惱起來。
其實無偌久，我對D的感覺嘛無去矣！
《體會１》
我深深仔體會著，分手愛真細膩處理，予人分的彼个人會有真濟的怨佮毋甘願，真正毋知影伊遐爾仔愛的人欲佮伊分手，我煩惱的干焦是伊會傷害我無？抑有，會傷害伊家己無？萬一發生這款代誌，是真大的遺憾，嘛辜負阮捌鬥陣做伙，美好的時光。
《體會２》
抑有體會著另外一件代誌，毋管是對方愛著別人，抑是無愛矣！用冤家佮講理的方式想欲「扳轉來」，抑是「轉去以早」是無路用的，干焦會共對方愈捒愈遠爾爾，𫝛時（siāng-sî—同時）共賰落來的感情一點仔一點仔磨擲掉，一直到半滴嘛無賰。
若是這段感情猶想欲繼續，就愛用「感情」的方式繼續牽挽；若是無愛矣！就愛「理智」出動，想看覓，有啥物代誌愛處理？講是按呢講，對事主來講是無法度分甲誠清楚的，伊所有的情緒，譬如：不安、懷疑、煩惱、驚惶……，規个倒佇我遮，我一直對伊講：「這些話不要跟我說，去找別人說。」伊無理解按怎毋好共我講，嘛無願意去揣其他的人講，我當場嘛誠歹明白講：「跟我說的話，會將妳想要的感情磨掉啊！」毋過，我若是有講嘛無路用，伊總是要經歷過，行過了後，才會明白佮相信。
《足忝耶！》
伊毋但情緒濟，問出喙的問題嘛愈來愈濟，聽伊講話，抑是佮伊講話敢若變成我的責任。毋管是當面講，抑是用電話講，我愈來愈忝。較忝的時就先袂講，毋過第２工，猶是愛敲予伊。伊聽我講我忝，會無歡喜：「跟我講話就說累，跟別人講話都不會累。」
「跟人家講話是我的工作啊！」
嘛咧參詳欲按怎改變關係，抑是鬥陣的方式，比喻：暫時請假幾月日，這段期間袂聯絡。
有申請非典小組的伴侶協談，攏安排好勢矣！２个人家己愛寫一篇簡介，我佮伊寫的有互相予對方看，伊講伊看我寫的了後，有較了解我的想法。後來決定分手，協談取消。
○3/27註：
今仔日翻譯一部份，感覺誠無聊，我根本無想欲閣去看遮的進前的代誌，當初欲寫這个主題的時，興趣趣，寫４篇了後，想著會使翻譯以前寫過的＜分手篇＞來鬥，感覺誠好耍。看內容時，才知影，我根本無想欲閣去看。毋過已經講出喙矣！就共翻譯完。
○3/28註：
今仔日，彼種無聊的感覺無去矣！翻譯較緊、較順，寫較濟，寫完，共這篇貼出來。
（華文寫於2018年;台文翻譯完2026.3.28）
教育部台語辭典，https://sutian.moe.edu.tw/zh-hant/
