「太痛苦了。」
經過呢半年，身邊嘅人都話我瘦咗好多，衰老咗唔少，望落冇以前咁開心😢。以往我都返過有毒職場，不過通常都會及早離開。但有時都會諗「如果我繼續做落去，會發生咩事呢？」，直到半年前受到化妝學校嘅工作邀約，我就知道機會來了（我係呢間學校學生，所以大概都知道呢度嘅工作。），我想測試自己嘅能耐，測試一個人究竟喺有毒環境下能唔能夠平安生存，就應承咗了。當中遇到職場小人、混亂嘅工作安排、低人工、高工作量等等。
「工作漸入佳境，但痛苦沒有消失。」
起初入職時，同事會對我惡言相向、推卸責任要我孭鑊😔，呢度大部分工作係有SOP，但唔會有人會教，要去自己摸索，但一做錯做慢，同事老細會俾臉色你睇 ⋯⋯ 每次返工就好似玩踩地雷，唔知幾時又會踩中陷阱，有時踩中都不自知，我對自己嘅工作能力完全失去咗信心。
經過時間嘅洗禮，同事們態度友善咗，我哋會有講有笑分享生活瑣事，我亦對佢哋多一份諒解同慈悲（有時都會諗佢哋都只係受有毒環境影響嘅可憐人），但傷口還在，而家同佢哋相處都依然需要消耗好多能量。雖然工作變得熟手，理應工作會相對輕鬆，但每次放工都感覺自己靈魂被抽空一樣，好怕又會中陷阱而不自知，好怕又做錯事被責怪。以往工作經驗中，就算工作有幾忙，我都可以利用放工時間做唔同嘅事情增值自己，但而家就算有幾日假放，身心都係好疲倦唔想郁，昔日嘅自信已經被磨滅得七七八八。
「是時候離開。」
我以為只要夠堅定，心理質素夠高，就可以喺任何惡劣環境下生存。但今次嘅經歷令我有新嘅睇法，如果知道環境有毒，離開就對了。早前喺Threads睇到一句好中肯嘅說話：「當你聞到屁味，要做的事情是捂著鼻子快跑，不是去聞然後分析成分。」不然會慢慢被毒侵蝕、同化，將濁氣散播其他生活層面。
夠了，係時候結束，去一個真正滋養自己嘅地方。
