前２工，自瑞芳坐火車轉去台北，拄好的時間是區間快車，想著是連假３工的時間，人會真濟無？
我想欲佇台北車頭落車，坐第10，抑是11車廂，到台北了後，拄好是捷運入口的樓梯，毋免行遠，較省時間。
佇月台，若是區間車，愛佇８，抑是９的車廂所在等車。車進站，頭前是第１、２節，愈後壁車廂，人愈濟，有人是徛的，停佇我的面頭前的是第８車廂，我看車內底有一个優先座無人坐，想欲起去，隨有人坐落去，我改去第９車廂，人愈濟，無位，我行去第10車廂，有半个車廂停跤踏車，跤踏車邊仔，有人坐佇塗跤。
有一个位無人，我問邊仔彼个人，彼的位有人坐無？伊講有。我揣一个所在徛。咧想頭前的車廂有較少人無？若是按呢，下擺咧歇睏日就愛佇頭前的車廂等車。看著這个車廂上頭前的位，換人坐，干焦一个人咧坐，我行去問，邊仔有人坐無？伊講有人坐，我行去第９車廂。過２站了後，想著，我一个人閒閒無代誌，行去頭前車廂看覓。
就開始行，行過２个車廂，門一開，哇！遐濟輪椅佇內底，路的中央嘛有一台，我那行那共彼个人講：「我行會過去。」伊共我講：「歹勢。」閣有一个所在嘛是誠狹，我共講：「我行會過去。」
無疑悟，倒手邊紅色的優先座有一个位無人，邊仔彼个查某人咧共椅仔頂的便當蓋提起來，我問：「遮有人坐無？」無，誠好，會使坐落來，毋免用徛的。我看門邊寫的是第６車廂，是無障礙車廂，規个車廂內底攏是輪椅。
我邊仔彼个查某人想辦法共便當蓋囥佇伊的行李箱的頂懸，繼續食便當。
我的頭前、２爿邊仔攏是查某人，穿插、帽仔打扮甲誠整齊，輪椅的後壁、２邊吊幾若个揹仔、袋仔，in幾若个人咧開講，講：「下雨的話很麻煩，這裏要遮雨，那裏也要遮，馬達（或電池）不能淋到雨。」「Ｘ大哥幫我貼反光貼紙」
看著in，頭一件想著的是，in誠不幸，跤無方便，比人較辛苦，毋過，彼是in的人生，我想較濟嘛無路用。我本來想欲佮隔壁彼个講話，問in去佗位𨑨迌？想想一下，貧惰講話，就目睭瞌瞌歇睏。
到南港，有人欲落車，我有聽著月台頂有人捒鐵枋仔來架（khuè）佇車門的地板頂懸，有２隻輪椅落車，我正手爿彼个講：「我過不去。」我隔壁彼个徛起來，去門邊鬥相共，搬鐵枋仔的人共枋仔改搬來我的正手爿的門邊，講過袂去彼个佮另外一个順利落車。
隔壁彼个轉來坐好，咧講：「如果來不及的話，我想要擋在門邊，讓車子不能開。」喙咧唸松山站幾个人欲落車，台北幾个，板橋幾个，看起來，伊是這个團體出去𨑨迌幫助逐家的人，伊無坐輪椅，跤手是好的。
看in坐電動輪椅，會使自由出來，車頭的服務誠好，定定看著人員攑鐵枋過來，原來有人欲上車、落車；嘛有目睭無看的人，一手tà 佇義工的肩胛頭，綴義工行，上車，落車嘛有人來接。台灣是誠進步的所在，服務遮的需要服務的人，in會使家己出門，毋免厝內面的人𤆬，行動自由，會使過正常的日子。
（2026.5.4.）
○查字典
￭電腦：教育部臺灣台語常用詞辭典 https://sutian.moe.edu.tw/zh-hant/
￭手機：有「教育部台語輸入法」的APP可安裝，可以用講的。
