😱震驚！2023年居然剩不到100天了？！
Tng-tong 你倒手烘肉、正手食柚仔，閣攑頭看月娘 ê 時，想袂到一冬又閣欲過矣！！！台語有一句諺語是按呢講：「年驚中秋，月驚十九」，若到八月半中秋節，就代表一冬已經過較 ke 一半矣！若到十九號，就代表月底 mā 差不多欲到囉！佇遮，為著鬥句押韻，「十九」愛用文言音讀做 si̍p-kiú。
這句俗語 mā 有另外一个版本「年驚中秋，人驚四九」，「四九」仝款愛用文言音讀做 sù-kiú，人若食到 49 歲，論真講人生 mā 差不多是過一半矣！
毋管是佗一句，攏是 leh 提醒咱時間是過了真緊，咱著愛把握時間，做咱真正想欲做 ê 代誌，共時間囥佇家己感覺上重要 ê 代誌！
予我想著《俗女養成記》陳嘉玲上尾一集所講--ê ：「你是啥物時陣開始袂記得，袂記得這世人其實足長的，長甲你會使跋倒閣徛起來，做暝夢閣醒過來；你閣是啥物時陣袂記得，這世人其實足短的，短甲你無時間閣去勉強家己，無時間閣去討厭你家己」。
