一、短文
開始寫，攑手開始寫。有寫就有效，會進步。我50年無講台語，愛閣自記持內底共台語想轉來。佇2019年開始講台語、寫台文，2021年對查某孫講。紲落來佇厝內攏講台語，出去外口嘛講，佇市場、𥴊仔店先講，拄著較老的、較濟歲的就講，落尾發覺有的少年人講甲誠輾轉，我毋免揀人講矣！
培養講的勇氣是上無簡單的，要想予好，心頭掠予定，毋過嘛定定予人搝去，綴伊講華語，等我想到的時，干焦賰「多謝」通講爾爾，無要緊，若無機會講，至少上尾的時會使講「多謝」。
其實逐家攏聽有，聽無的人會共我問，到這馬為止，干焦有一个便當店的oo-bá-sáng共我講：「我不會講台語，我是外省人。」看伊的年歲佮我差不多，應該是佇台灣出世的，我講我欲買佗一種便當，伊嘛聽無，有夠譀。看伊毋是這幾若年才自中國來的，因為「外省人」是台灣的講法。
我若知影伊對方是中配、外勞，我就講中語，莫為難人。
有一間咖啡館，我有閒的時，會去啉咖啡，坐坐一下。去二、三擺了後，共咖啡師講台語，看起來沒問題。
有一擺，我聽伊佮人客開講，聽著伊是日本人，我欲走的時，問伊：「你是日本人嗎?」伊講：「是」。
「喔！我不知道。你會台語嗎？」
「我的台語不太好。」
我後擺去就佮伊講中語。伊來台灣誠濟年，有想到學台語，有的人佇台灣出世，抑是已經蹛80年，講伊袂曉台語，到底是咧想啥？
（2026.5.8.）
二、句
￭佇（tī）
我細漢的時，阮兜蹛佇宜蘭，坐火車去台北，會過磅空，我想講是好耍的，毋知曉是按怎愛過磅空。
￭咧（teh ）（--leh ）
我當咧睏，伊傱入來房間，共衫仔櫥的門挵甲砰砰叫，甲我吵精神。
￭佗（toh）
囡仔問彼个阿啄仔：「你佗位來？恁兜蹛佗位？」
●若
（ná）
伊敢若共家己當做頭家本人，大主大意拚俗賣。
（nā）
你若跤手無較緊咧！這幫車趕袂赴，上班就會晏到。
●偌（guā ）
七、八十歲的人，有當時仔會想著，活的時間猶賰偌濟？
●那（ná）
伊那行那看手機仔，規仔人去挵著電火柱仔。
●哪（ná）
代誌哪會變甲按呢？
○查字典
￭電腦：教育部臺灣台語常用詞辭典 https://sutian.moe.edu.tw/zh-hant/
￭手機：有「教育部台語輸入法」的APP可安裝，可以用講的。
